中環在線：長和世紀重組 美銀美林有份
霍建寧大刁益女婿？
■美銀美林全球企業及投資銀行部亞太區主管Matthew Koder在2011年與霍建寧大女霍尚欣結婚。
今期中環熱話肯定係「超人」李嘉誠將長實（001）與和黃（013）合併重組，投資銀行界當然最關心邊間投行攞到呢單世紀大刁喇，大家都八卦研究點解美銀美林有份參與，美林有乜咁特別？皆因和黃大班霍建寧嘅女婿Matthew Koder係美林高層，大家估計美林因此有份參與呢單刁囉。
行內出名 主管亞太區
霍大班嘅大千金霍尚欣2011年底跟Matthew Koder結婚，霍大班呢位澳洲籍女婿今年大約四十幾歲，喺投行界原來好巴閉，曾經喺高盛做過10年，2003年加入瑞銀，好似話之後步步高升，仲成為瑞銀最後生嘅董事總經理，先後負責成個亞洲同埋環球資本股票部。佢2011年就轉咗去美林，負責成個亞太區投資銀行。
聞說佢極之勤力兼且積極，搶刁冇手軟，比任何同事都早返工，同事隨時隨地都可能收到佢嘅電郵或者電話。總之跟佢工作就要打醒十二分精神，仲要行動迅速。
老實講，霍大班女婿有呢啲特質絕對唔出奇，霍大班每年袋過億年薪，肯定都係能力與魄力驚人，阿女搵老公，都一定要搵個有番咁上下㗎喇。
美林係咪因為Matthew Koder而攞到長和重組呢單刁，都係市場八卦友口痕猜測，投行實力都好重要嘅。有趣嘅係，齋睇長實、和黃嘅通告封面，只得滙豐與英高兩間投行，要睇埋內文先知美林有份，佢將會同滙豐一齊做長地（合併後長和分拆出嚟）嘅上市保薦人，仲借出100億元畀長地向長實、和黃買地產資產，角色好吃重㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
