魚樂無窮：屈機公用股完美誕生
■儲局完成一連兩日會議，聲明重申耐心等待加息時機。 資料圖片
儲局完成一連兩日會議，聲明重申耐心等待加息時機，不過市場嘅共識係，最快加息時間已由第二季改為第三季，難怪十年期債息不升反跌。加息無期，磚頭公用股gogogo，今日推介嘅港通（032），雖然數公用股好少數到佢，但完全有曬板塊屈機特質，中線睇升兩成！
港通主要業務有三瓣，全部同車有關。第一，持有五成西隧及39.5%大老山隧道權益，前者專營權至二○二三年，所以每次「合理」加價乜乜乜，政府都冇曬符，就算真係回購，都有港通著數，屈機指數五粒星。第二，持有五成快易通（Autotoll）股權，喺香港，隧道塞車變成新常態，時間就係金錢，車主採用Autotoll比例只會有增無減，港通坐定定收錢，屈機指數又係五粒星。第三，持有駕駛學院七成股權。身邊總有親戚朋友話學緊車，仲有好多唔係一take過，駕駛學院收費又比普通學車師傅高一截，屈機指數再次五粒星！
業務屈機，全面反映喺財務報表上，近五年盈利複合增長率近一成，手頭淨現金12.8億相當於市值逾四成，派息十幾年無間斷，仲要係季季有，啱曬食息一族。文又得武又得，股價屢創新高變得理所當然，但最新息率仍有3.6厘，正呀喂！用NAV價十蚊做目標，潛在升幅兩成，今年到價機會甚大，屆時仲有三厘息喎。
唐牛
https://www.facebook.com/tongcow88
唐牛
魚樂無窮 - 唐牛 舊文
