中環在線：唐唐新馬仔 周日首落場
■唐唐係愛馬之人，今次隻「回眸一笑」個名仲好有心思㖭。 設計圖片
生於大富之家嘅唐英年爭輸咗做唔到特首，呢幾年反而更加逍遙自在，閒時去旅行、嘆靚紅酒，仲可以重拾佢多年嘅興趣，養番馬仔做馬主。佢新買番嚟嘅馬仔「回眸一笑」，嚟緊星期日就首次落場，唐唐同佢老友、金管局前總裁任志剛應該會去打氣喇。
唐唐既愛酒亦愛馬，根據《百年毗陵唐氏》一書，唐唐十一歲就識睇馬，有次佢阿爸唐翔千去完馬場回家，一入屋唐唐就同佢講，「今日你養嘅馬跑唔出，係因為馬姿唔好」，原來佢會趁阿爸入馬場，伏喺電視前睇馬。
佢之前養過超過十隻馬，其中兩隻「知己知彼」與「大師」就同前政務司司長許仕仁一齊養嘅，二○一一年佢忙於競選工程就冇再養新馬，不過閒時亦會入馬場走走。而唐唐最近一次拉頭馬已經係六年前嘅事，二○○九年初佢名下隻「心福」贏馬，呢隻馬都已經退役了。
■（左起）榮智健、李國棟、任志剛同李國能，不時會相約一齊睇馬。 資料圖片 榮智健李國能有馬上陣
唐唐新養呢隻馬仔「回眸一笑」，英文名係「No Regrets（冇遺憾）」，大家可以隨便測猜有乜寓意，華華就覺得中英文聽落都係開心嘅感覺，即使有啲嘢爭唔到，盡咗力，回眸一笑，都無憾嘅。
呢匹新西蘭新馬，只得三歲，從未試過正式比賽，星期日就係佢嘅處女跑。
除咗唐唐，馬會榮譽董事榮智健名下「飛龍」同前大法官李國能名下「勁勢」亦會上陣。舊年中，榮智健同李國能一齊養嘅「捲土重來」贏出，唐唐都有份拉頭馬，佢哋成班老友周日會否齊集馬場呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
