賣地好過起樓
2015年01月30日
美國聯儲局會議，會後聲明大致維持先前論調，未有明顯因為歐洲放水調整對加息立場，但對經濟前景睇好咗少少。?家無論港股、A股同美股都係近期高位回落，高追就要捱頂頭風，都係等佢插完落嚟至買穩陣啲。
儲局暗示經濟向好
聯儲局聯邦公開市場委員會(FOMC)的議息聲明中重申，在加息問題上仍要保持「耐心」，如果再睇真，儲局對經濟前景似乎樂觀咗，例如認為自12月儲局上次會起，經濟「堅實地擴張」，唔同上次只係話「溫和擴張」，對關注的就業情況就話「強勁地增長」，取代上次用「堅實地增長」的字眼。
聯儲局喺描述消費時，提到「能源價格下跌提升了購買力」，上次無講到此點。有中環茶友話，油價下跌令大部份國家擔心通縮威脅，有人認為咁會令聯儲局主席耶倫在加息問題上放軟手腳，但換轉嚟睇，美國家庭用喺買汽油嘅錢唔少，油價下跌大家多了錢使，以美國人性格必然增加消費，令經濟升溫，如果咁都要延後加息，咁即係永遠唔使加啦！當然，耶倫?家咁講，唔代表加息步伐或幅度一成不變，但至少現階段無轉軚的理由喎。
茶友話，無論歐洲放水、印度放水、中國放水，以至新加坡變相貶值，所有動作全部都應該係耶倫預期之內，因為美元一強，牽動全球資金回流，呢招萬佛朝宗，必然令各地增長放緩，問題只係幾時頂唔順而已，所以議息聲明後，個市可能會消化吓，但似乎唔見到太大震撼。
睇番美國加息步伐，?家同內地利率政策，剛好呈相反方向。美國銀根抽緊，中國就慢慢放鬆，從炒股角度，投資者可以從鬆鬆緊緊的韻律中，擇股而炒。內地早排升得太急，孖展市場谷得太快，?家監管當局要幫個小泡沫放氣，所以A股唔易大幅突破。如果個市因為水緊消息下跌，股民等佢跌得深小小，可以視乎財力入啲貨，等佢升反彈又放出來食吓胡，總之唔好太貪心。
中美股市乏力，恒生指數全日偏軟，收市報24595點，下跌265點，全日成交895億元。國企指數收市報11736點，下跌227點，跌幅略大過恒指。中資金融股受壓，濠賭股反彈後再有沽售壓力。渣打(2888) 傳換行政總裁，股價再向下插。核電股喺憧憬走出去政策下表現硬淨。
美國息口暫時話加未加，財團投地買地仍然活躍，好似前財爺梁錦松做老總間南豐，最近頻頻出擊，唔知阿松係咪真係咁睇好樓市啦！呢兩個星期，南豐投完將軍澳日出康城站，又同領匯(823) 投觀塘商業地。呢兩日再傳佢同中資傾緊入股日出康城項目，總之消息多多。
港鐵再撩上新高
在投地市場咁活躍的情況下，做咗批地大地主的港鐵(066) ，又行多兩步再創新高。有人笑言，起樓好過賣樓、賣地又好過起樓，港鐵坐地分肥，唔係點做都有錢分，政府仲逼佢賣多啲地，樓市好、港鐵就會好喎！
陸羽仁
金融High Tea 舊文
