一周三件：木薯低位待爆
■木薯資源股價近半年已調整近四成，但公司業績改善，盈利增加，值博率相應提高。 互聯網
木薯資源（841）下家環保乙醇燃料業務，獲得阿爺祝褔，集團主打木薯片採購瓣數，繼續有運行，而股價由上年八月到家陣，已經調整近四成，又有得諗。
木薯係全泰國最大木薯片採購商，同祖國最大產品出口商。阿爺計劃將環保乙醇產能，提升到二○二○年一千萬噸（係二○一○年時四倍），但對上幾年，乙醇生產計劃大滯後，到家陣先發力，而嚟緊兩年，會有六至七間汽油醇廠投產。
國策需求兼備
據木薯講，當中有個別廠房，已經指明要木薯供應產品。睇到嘅係，木薯食住環保國策，主打瓣數需求keep住上。又木薯二○一五年半年度（三月年結）收入，雖則跌咗18%，到十八億銀，但喺開支減少情況底下，盈利增長咗四成，到貼近六千萬銀，木薯就預計，喺泰國新一屆政府上場，政府唔會再進行市場幹預，加埋集團擴大採購點，收購量可以逐步提升。喺呢個point，對木薯可以攞到兼供應到充足貨源，而谷番起下半年嘅收入，亦係好緊要。
唔好估多，集團全年盈利係咁意增長兩成，到1.4億銀，就算計埋上年配股全面攤薄，預測PE都係得4.3倍。又上邊所講配股，係木薯上年購入大股東兼掌舵朱銘泉祖國酒店資產而配發，所配售1.35億股，係冇出過街，大股東喺木薯股權，亦由原先的50.15%，增加到61.7%，而所講每股配股價0.83元。木薯經過近五個月調整，現價（1.04元）創咗半年低位，同配股價亦已經唔係相差好遠。
木薯再調整，質穿一蚊兜一轉，值博率仲高，就算當現價翻四分之一番到1.3元計數，今年預測PE先得5.4倍。又木薯二○○九年時，股價曾經見過2.93元，目標價同PE水位，未有耐升過籠。
錢雋
細價股專家
本欄逢周二、三、五刊出
錢雋
一周三件 - 錢雋 舊文
