魚樂無窮：專業旅運馬年食尾糊
■專業旅運期內原地踏步，落後得離譜，有權喺馬年食尾糊。 資料圖片
東瀛遊（6882）舊年十一月底上市，至今累積升幅42%，同業專業旅運（1235）期內原地踏步，落後得離譜，有權喺馬年食尾糊。
專業旅運舊年十一月中曾高見1.22元，因業績倒退遭逢大洗倉，跌至0.77元始喘穩，累挫37%。公司截至舊年九月底止中期賺一千六百一十六萬銀，按年倒退22%，成為腳仔軟原因，但現價年度化市盈率只得十四倍，東瀛遊預測市盈率十五倍，專業旅運唔輸蝕。業績報告指倒退其中一個主要原因係日圓貶值影響稍減，要留意嘅係，日圓喺舊年底再急挫，由七算變六算，十個香港人，有九個半都話要去日本一趟，嚟緊截至三月底止全年業績，絕對有睇頭。公司正收購深圳順風旅行社55%股權，落實後勢成為另一增長引擎，前景有保證。
大股東高偉明今年初曾增持公司股份，作價約0.83元，可視會底線，望番轉頭，舊年十數次增持，講緊全部係一蚊樓上，現價0.96元入場，屬安全範圍。
又公司最新市值只得4.9億銀，兼有1.6億淨現金，大股東持貨七成樓上，有齊近期熱炒主題－－殼股嘅條件。驚坐貨輸機會成本？有埋四厘幾息打底，細心到呢。估值、前景、概念俱吸引，炒番上六億市值，都有22%水位，有排未到殼價嘅門檻。
唐牛
https://www.facebook.com/tongcow88
唐牛
魚樂無窮 - 唐牛 舊文
