中環在線：滙豐總行「大米」埋位
■華華周二淩晨直擊滙豐呢件巨型藝術品登陸總行。 
周二淩晨一點左右，正當大家好夢正酣之際，中環滙豐總行就有一件特別事發生喇！華華前日咪叫大家留意滙豐總行對住皇後大道中嗰邊，有多個鐵欄圍實嘅位置，將會擺放一件巨型嘅藝術品。呢件藝術品周二淩晨就正式安放喺呢個位置，驟眼睇，佢好似一支火箭，又似一粒大米。
倫敦總行都放一個
周二淩晨喺滙豐總行，一早就有接近二十名戴上安全帽、著住螢光背心嘅工人守候，旁邊仲有兩架吊臂車，等到差唔多一點，一輛重型貨櫃車終於駛到，多名工人即刻各就各位，埋位做嘢。當貨櫃頂門一打開，就見到呢件瞓低似鯨魚嘅藝術品，用白色布包起，橫放喺貨櫃入面。
工人小心翼翼將佢吊起，再豎直，然後擺好。呢件藝術品豎直之後，原來相當之高，高度跟旁邊嘅椰樹差唔多，應該有三層樓咁高。
呢件藝術品係由一名英國藝術家專誠為滙豐一百五十周年而設計製造，造咗兩個一式一樣，一個放喺英國總行，另一個就放喺香港中環總行；兩件藝術品仲係擇好時辰，喺港英兩地同一時間擺好位置㗎。
消息人士透露，呢件藝術品係一粒米，內有乾坤。可惜夜晚實在太暗，離遠真係冇辦法睇清楚中間係乜東東。
而工人放好佢之後，亦旋即用帳幕將佢圍住，似係要保持神秘感，留待三月三日慶祝一百五十周年當日先至揭幕。
至於呢件藝術品有乜寓意？咁就真係要留畀滙豐管理層或者嗰位藝術家去講解嘞，華華費事亂講獻醜。不過佢外形似火箭，如果滙豐股價好似坐上火箭咁一飛沖天都唔錯，股東咁就得米喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
