中環在線：金髮女郎要求合照
郭思治長城曬肌肉
■郭思治今年踏入六十歲都可以操到呢副身材，真係唔講得笑。
踏入花甲之年嘅大隻佬股評人郭思治（郭Sir）喺北京長城為港男爭光。話說舊年底佢去北京遊長城，行行嚇覺得熱熱哋，就除衫散熱。佢唔除猶自可，一除就吸引唔少遊客嘅艷羨目光，仲有位外國女遊客主動上前要求同佢合照㖭呀。
郭Sir喺金融界出名係大隻佬，就連財經界運動健將、三十幾歲嘅會德豐（020）主席吳宗權都冇郭Sir操得咁弗，佢真係拍得住美國漫畫嘅爆肌主角。
狂做sit-up收腹
郭Sir噚日講起，佢舊年十一月去北京出差，當時應該得幾度，佢趁有時間去長城一趟，可能平時做開運動，身體特別好，行兩行已經覺得熱，佢索性除衫繼續行，估唔到竟然有位外國女遊客上前要求合照。郭Sir一向有求必應，當然大方答應，仲擺咗個專業嘅大隻佬pose。
郭Sir六十歲都可以操到呢副身材，其實都係靠少食多運動。佢成日話「飯可以唔食，運動唔可以唔做」，佢每日至少要操一粒鐘，最好係兩個半鐘，仲要狂做仰臥起坐（sit-up）收腹，唔係點樣操到呢六嚿腹肌。
講到食，郭Sir平時食得極少，早餐只食兩隻烚蛋白，午餐係正常人一半或者三分一份量，晚餐只食細半碗飯、一碗水煮菜配肉，就係咁多。華華噚日同佢食晏，就見佢乜都食，食腸粉時仲要點埋甜醬，不過佢之後應該喪做運動消耗番佢。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
