單騎獨走
2015年03月12日
杜指彈一彈，前晚再大跌，好彩香港跟美國唔係跟得足。雖然話跟唔足，但內地個市都唔係咁靚仔，所以港股無理外圍開市升一升後，好快就回落，出現咗七連跌。
偷步消化耶倫無「耐性」
美股呢排咁反覆，相信係提早消化下個星期美國聯儲局開會嘅消息。由於之前公佈就業數據強勁，好多人估今次會議，主席耶倫有可能取消保持「耐性」的說法，暗示低息環境結束，為調高息口做準備。
如果呢個講法無錯，美股喺18號開會前，都仲可能反覆打底，杜指試吓萬七點關口唔奇。港股氣氛點都會受啲影響，但如果佢唔係咁跟足美股，或者會早小小搵到支持，如果手頭無乜貨，又或者有膽博吓反彈嘅，可以係呢個星期尾或下個星期尾試試撈啲國貨。
係美元強勢下，其他地區幣值都要急急調整，泰國出乎市場預期減息四分一厘，政策利率降至1.75厘，政策委員會以4比3的投票結果通過減息決定，反映亞洲區嘅減息同貶值潮未完。
各國貨幣戰未完，全國政協委員、財政部副部長朱光耀表示，傳中國推出量化寬鬆政策(QE)是不實之詞。
佢咁講係因為市場傳出，財政部已經批覆了3萬億元人民幣的存量債務置換，在未來置換共10萬億元的高息地方債，引發中國版QE。
朱光耀解釋，有關傳言是不實之詞，稱地方債務置換是在國務院對地方債批准規模之下、企業與商業銀行之間的契約行為。
中美忙於應付各種金融炸彈下，港股呢排相當奄悶吓，好多股份紛紛尋底，強勢嘅長和系由昨日起，逐步進入改組的關鍵時刻，「長江一號」長實(001) 正式停牌，得番隻和黃(013) 獨跑，喺跌市中佢全日領放，升到去107.5元，大升2元，距離一年高位只差1元。
有人話，長江一號停牌，如果股民睇好改組想落注，就只能夠買和黃，變成聚焦咗係一隻股份，大家要買就買獨贏。
長和改組，焦點係和黃股東會。有人之前喺長實股東會問過改組換股比例，暗示若和黃小股東不滿換股比例，有可能否決建議，長實副主席李澤鉅就答得好直，話如果係咁股份咪跌番落嚟！如果按照呢個邏輯，和黃股價升得愈多，對計劃通過機會愈大，因為股價升咗咁多，小股東唔滿意咪賣咗佢囉，好過否決攞自己嚟搞。
至於係咪所有小股東都咁理智，又或者大鱷會唔會另有盤算，無人敢寫包單，如果小股東想穩陣啲，有貨可以分段食吓胡，因為賺錢落袋點都唔會錯，沽啲留啲，咁就肯定可以享受愉快嘅股民奇遇旅程啦！
昨早由於內地股市反覆向上，帶領港股一度升過，內地公佈經濟數據參差，港股尾市跌勢加劇，恒生指數收報23717點，挫179點；國企指數收報11417點，跌90點，成交逾782億元。
炒匯豐紀念鈔易過炒股
匯控(005) 及中移動(941) 齊跌，共砌低恒指84點。匯控一度低見65.9元，再創逾兩年低位，收造65.95元，跌1.15元，好多人話匯豐紀念鈔唔怕炒，匯控股票就唔好炒。
有中環茶友就話，匯豐紀念鈔發行量其實唔細，而且仲有相當溢價，如果唔係想收藏，咁見好都係收割好過。
除了兩隻大笨象，環渤海煤價跌至每噸488元人民幣，較上周下跌8元人民幣，創八個月單周最大跌幅，神華(1088) 收報18.76元，挫0.74元，為昨日包尾藍籌，內地經濟慢，加上污染問題惹起社會熱議，神華作為最大煤炭供應商，變成首當其衝，雖然股價由高位插唔少，但暫時大家見到佢都仲係唔係幾開胃。
陸羽仁
金融High Tea 舊文
