魚樂無窮：擠牙膏式批股有玄機
■映美將強攻移動支付業務及O2O雲端打印業務，與總理李克強推崇嘅互聯網+不謀而合。 資料圖片
前輩教落，貨疏價必揚，意指街貨越少，股價越易舞上，從經濟學角度睇，係好簡單嘅供求關係。當然，街貨少兩邊棚自然會較鬆，意味買貨要隔空掃，沽貨要質低幾格，令不少散戶卻步。不過，如果有業績支持，有高息護體，買貴幾格其實問題不大，相反更係早買早享受，今日推介嘅映美控股（2028），乃典型例子。
映美街貨有幾疏？回帶睇番通告，早喺舊年10月已表示兩大股東持股達84%，經過一輪配股活動後，最新持貨仍達79%，意味公眾股東只佔21%，與最低要求25%依然有一段距離，公司亦不諱言，繼續積極解決。奇就奇在，舊年底批股後股價不跌反升，反映接貨者惜貨如金，寧願放入保險箱。
點解會咁？不如從基本因素出發。映美主要喺內地產銷打印機、稅控設備及其他電子產品製造業務，吸引之處莫過於派息疏爽，以去年全年共派0.199元計，現價息率高達10厘，好難唔令人流口水。高息背後當然有業績支持，近四年業績，一半增長以倍計，現價市盈率僅得11倍，未來將強攻移動支付業務及O2O雲端打印業務，與總理李克強推崇嘅互聯網+不謀而合，煞食度達十粒星。從呢個角度出發，難怪公眾持股問題遲遲未解決——管理層同樣惜貨如金也，咁嘅牌面，後市睇升睇跌？唔使講得咁白啦嚇話。
唐牛
https://www.facebook.com/tongcow88
唐牛
魚樂無窮 - 唐牛 舊文
