掟上又掟落
2015年04月10日
港股大爆升，成交急增至逼近3000億元。有中環茶友形容，?家成個世界都以10倍速運轉，股市由熊轉牛，由牛轉熊，可能要兩、三年時間，今次港股大爆炸，基本上只係四月開始起步，但以目前速度上升，好快就會挑戰歷史新高！喺咁環境，你話呢架高速過山車掟彎又急又快，好似昨日開市10分鐘急升近1700點，升到近28000點，之後急插近1200點，再彈番都係升得700點，高追即刻中槌，係咪好得人驚先？
擦鞋仔智慧已過時
喺呢啲大時代，資訊急速傳遞，以前話中環擦鞋仔教你買股，就代表股市過熱，因為由慣常炒家買股，傳到擦鞋仔都買股，可能已過咗一年，到擦鞋仔都炒，股市都已見頂快炒完。?家中環已經無擦鞋仔，只有擦鞋阿伯，不過佢哋都係低頭一族，識得用網絡收料，所以好快就知道股市爆升，唔使等一年。所以昨日股市升、擦鞋阿伯當日已炒緊，舊時見到人人炒股要馬上走的智慧，已經過咗時。
好似個市狂升，無論高官同報紙社論都叫你小心，呢類言論係「太子都食唔壞」嘅保嬰丹，但係咪好應棍就唔敢講囉。喺呢種大時代自處，首先係認清大環境，然後先制訂策略，因為過早睇淡或太過保守，一樣會有風險，風險就是在升市時開始時太早沽到一股都無剩離埋場，結果睇淡一年個市仲升緊，到那時已是浪尾，先忍唔住入市，咁就好易中棍啦。
呢排好多人話要請我食飯，順便收吓料。一個人每日三餐，飯食唔到咁多，有料不如喺網誌同專欄公諸同好啦。
我成日講，呢鋪升市有阿爺政策性需要，就係利用股市改造經濟同將人民幣帶出中國，故此香港呢個渠道好重要，所以你見阿爺開完滬港通又開深港通，跟住又畀基金買港股，總之港股唔得搞到得。喺呢個情況下，港股已經A股化，如果後市預測係內地已形成牛市，一級級咁上，港股在這兩日突破後，已形成牛市，都會有相同的級級上形態，如果你信呢個分析，咁長線持貨就係主要策略，短線炒出炒入，有胡食時，都唔好沽得太盡，以防太早好似中文大學新亞書院校歌咁唱︰「手空空，無一物」，否則無貨睇住個市升，十分無癮。
炒落後衰股要揸實
昨日港股一開好快升1700點，喺咁癲市況下，陸羽仁唔建議大家高追，寧願等佢定啲、低啲至買，即使短炒都係咁，甚至係即日鮮，都等回吐時入，成功機會較大，內地股市有升10%、跌10%停板的限制，港股無此限，內地炒家更大展所長，20、30%咁舞上舞落，你在升得好急時掂佢，半個鐘可以輸到無咗條褲。
通常呢類升市，最初係優質股帶頭全面爆上，跟住係炒落後，好似內房呢個落後板塊昨日就有少少發力，隻中國海外(688) 都升6.5%，衰咗好耐的花樣年(1777) ，一係唔炒，一炒更大升23%，內房有少少尋寶feel。講開衰股好似隻雨潤(1068) 之前大股東祝義材遭內地檢察機關監視居住，股價插水，昨日亦報復式大升30%。
所以你手頭上若有衰咗好耐的紅色股，?家就唔好郁住，博佢突然炒起。若然真係本質衰，升到見家鄉就要減倉，套現等回吐轉買食正未來大浪的優質股。
雖然內地股市回調，上證指數收報3957，跌37點，但資金紛紛南下投資港股大勢未變。港股通於下午兩點前已「爆額」，較周三提早約二十分鐘用盡額度。當中，正通汽車(1728) 、中海集運(2866) 及華寶國際(336) 股價表現最好，各升一成半至兩成。
http://pop.stheadline.com/section.php?cat=extra_4
睇頭條PopNews 陸羽仁推介最準
陸羽仁
金融High Tea 舊文
