魚樂無窮：七億市值超級現金牛
■連達科技手頭現金4.6億，零負債，名副其實現金牛一隻；圖為集團主席蕭保羅。 資料圖片
慕詩（130）平地一聲雷，單日炒高兩成，進一步印證殼價自我調節機制。既然係咁無謂拗頸，今日再推介滄海遺珠股——連達科技（889）。其實舊年亦介紹過，簡單再講下公司背景
︰連達主業為設計、製造及銷售適用於電子消費產品、數據處理器及其他電子系統嘅磁性元件，專注高檔市場，包括航空、軍事、醫療設備、電訊及數據處理設備、科技設備等。
睇番近三年業績，每年賺三千幾萬，穩健卻不起眼，因此價值久久未釋放。噚日雖炒高14%，但市值7億未夠，奀豬一隻，望一望資產負債表，不得了！手頭現金4.6億，零負債，意味昨日收市價2.06元中，有1.44元係cash，比例達七成，名副其實現金牛一隻。睇股權架構，大股東岑氏家族持股74.5%，意味街貨市值只得億零左右，有心人要舞高話都冇咁易。呢一轉大牛市追落後，炒上10億市值一啲都唔過份，如果係賣殼，更可以衝上宇宙，每股NAV2.26元，肯定係今次升浪嘅中途站而已。
同場加映金利豐（1031），三個炒作因素︰1.大股東朱太剛行使可換股優先股，家族持股增至74.6%，看好指數十粒星。2.月初宣佈研究分拆業務，釋放價值指日可待。3.行家耀才（1428）同英皇證券（717）近日炒到啪啪聲，金利豐竟然原地踏步，圖表蓄勢破旗，機會來了！
唐牛
https://www.facebook.com/tongcow88
唐牛
魚樂無窮 - 唐牛 舊文
