一周三件：花樣年大增值
■潘軍任主席的花樣年，內房銷情理想，前景看俏。 資料圖片
花樣年（1777）呢期嚟自旗下彩生活（1778）股價爆升後嘅增值，高達50億元，花樣年市值，都係得76億元，花樣年自然係超級肥仔水！
彩生活上年6月尾上市，經資本化後，阿媽花樣年揸咗50.4%，或5.04
億股。後邊彩生活上市價3.78元，到家陣累升咗194%，花樣年應佔權益，由彩生活上市價所計等值19億元，大升到家陣56億元！就算減埋個本（應佔彩生活資產值權益）5.5億元，花樣年都大增值咗50.5億元，或每股0.88元。
彩生活喪升 水漲船高
連埋彩生活暫時嘅股價升值，花樣年NAV上到2.93元，現價（1.32元）PB，跌到去0.44倍。而投資報告畀彩生活嘅目標價，係現價要再翻半番，彩生活繼續放紙鳶，花樣年家底，keep住水漲船高！
又花樣年本身，揸土儲1.56億平方呎。啱啱喺月中，《證券日報》引述統計數據，20家已公佈銷情內房，花樣年銷售額24億元人仔，同比大升咗140%，表現係最突出！睇到嘅係，花樣年銷情唔削，加埋充足土儲發展，又阿爺放水減息刺激，喺嚟緊日子，自身增值/獲利，一樣咁肥仔！咪計多，以每方呎土儲增值/獲利100蚊計，花樣年額外增值/獲利156億元，或每股2.7元，NAV上到5.6元，PB係得番0.24倍。
IT界大孖沙TCL集團（深000100，市值1,050億港元）係花樣年第二大股東，揸咗花樣年17%。互聯網+年代，虛實齊齊玩，內房發展，亦升呢智慧型社區呢類高增值產物，花樣年若果拍住TCL，有新搞作，仲爆炸！
咪扯咁遠，炒花樣年，當反映番嚟自彩生活每股0.88元增值，花樣年係要升67%，到2.2元，到時，花樣年PB仲係得0.39倍！
錢雋
細價股專家
本欄逢周一、三、五刊出
錢雋
一周三件 - 錢雋 舊文
