A強港弱
2015年05月27日
A強港弱勢頭未改，喺基金互認的好消息推動下，港股雖然高開，但跟住就開始乏力，反之，內地股市就牛態畢呈。睇住內地股市咁癲法，老外開始嚟贈興，英國指數公司富時表示，啟動中國A股進入全球指數的過渡階段，將推出包括中國A股在內兩個新的新興市場指數。該公司表示
，A股在新指數中的初始權重約為5%。國際投資者可全面進入A股後，權重將增至32%。
借住中港基金互認出台，加上內地下月起將降低日用消費品的進口關稅，預計將有助刺激內需，加上新股認購資金「解凍」重返股市，內地股市連升六個交易日，再創7年收市新高。
大戶沽貨愈沽愈高
A股愈升愈有，尾段升幅進一步擴大，兩市均以接近全日高位收市，上證指數收報4910點，升97點，升穿4900關；深成指收報16903點，升552點。兩市成交再次突破兩萬億元人民幣，達2.16萬億元人民幣。創業板指數收報3618點，大升150點，又係歷史新高。
港股勁度就差好遠，一開市最高升過532點，可惜午後無力，最終全日升不足三百點收市。恒生指數收造28249點，升257點；國企指數收報14801點，升368點，成交就有2002億元。憧憬市場成交增加，港交所(388) 一度高見311.4元，創上市新高，收造309.4元，升15.8元，升幅是藍籌最勁，除咗佢係受惠股市成交多，佢概念獨特，係好多北水落嚟炒作指定必食菜式，令佢股價可以唔受港股暫時積弱影響。
基金互認出籠，金融股再起動，相關公司各有動作。春江水暖鴨先知，喺呢兩個月食住內地股市爆升的土炮基金公司惠理(806) ，大股東謝清海上星期五就配股套現咗十幾億銀，喺大股東減持下，惠理股價先升後跌，逆市插低，係典型好消息沽貨格局。
惠理近年喺股市行動經常先知先覺，中環茶友問點睇，我嘅睇法係牛市大戶沽貨，唔排除愈沽愈高，適時套現幾時都係明智之舉啦。
睇番謝清海呢批貨，好大可能係佢之前行使公司認購權買番嚟嘅，成本大約5、6元，當時個市仲未清，行使價同市價水位唔多，佢大手認股用咗幾億銀，都算係大膽之舉，結果惠理股價之後飛升，好快去到17元樓上的近年高位，謝清海唔使半年，投資賺咗超過一倍，喺咁環境下，沽貨絕不為奇。
睇番依家佢手頭仲有不少股份，如果用番相同數量去沽，可以再沽多五、六次，自己手頭大把子彈，自然唔怕趁好價賣啦，咁就解釋咗點解咁多人睇好基金業，謝清海都急賣，同時佢沽貨又會有人要。
大戶沽貨愈沽愈高，最經典當然係思捷(330) 嘅邢李㷧啦，佢多年前開始減持思捷，跟住股價跌一跌又上番，結果佢沽第一手貨同最後一手貨，差價以倍計，不過咁都唔緊要，因為好多年睇番，佢賣最平嗰手貨，都仲高過後來市價好多。
二線板塊跟內地有得炒
有人笑言，依家沽貨最多嘅大戶係邊個，答案係阿爺喎，所以呢個浪可以玩幾耐，就要睇呢個超超級大戶想托幾耐喇，至於港股低水，斷估遲早都會炒到嘅。
然而港股大圍唔係咁夠力，但二、三線唔少板塊仲係好有炒味。中國發佈軍事戰略白皮書，軍工股借勢炒上，中航科工(2357) 急揚8.7%，造10.32元；中國航天萬源(1185) 、中國航空工業國際(232) 分別爆升超過一成半。
其他板塊仲有中國核建與中國核電即將登陸A股，一眾本港上市的核電股被舞高，同埋軟件股突受追捧。
陸羽仁
金融High Tea 舊文
