魚樂無窮：尋找下隻格隆匯愛股
■萬裕科技最新市值9億。圖為董事總經理兼執行董事陳宇澄。 資料圖片
要數近期最hot港股討論區，不得不提格隆匯。呢個專門研究港股嘅內地網站，大時代期間推介股份例牌喪炒，更成功打造港A股呢個專有名詞。噚日爆升八成、高踞升幅榜首位嘅琥珀能源（090），正正係
格隆匯嘅新寵，四個賣點包括︰市值細、要有夢、有大佬及能控盤，即係一隻錢途無限嘅細價股。今日依照呢個方程式，搵到萬裕科技（894），如果有幸被格隆匯相中，肯定飛上枝頭變鳳凰！
萬裕最新市值9億，按照格隆匯高手嘅理解，升5倍都只係54億，升10倍也未夠100億，A股入面，100億市值其實只係起錶價，在強國人眼中，萬裕係動力十足小夥子。「萬裕主要製造及買賣電子零件同埋買賣原材料，邊有夢想？」咁你有所不知，經過高效研發後，集團生產嘅電容器，已可用於新能源汽車、風力及太陽能發電系統，技術不易抄襲，未來盈利勢必幾何級數上升。試問而家有邊個國家唔係瘋狂搞環保工作，強如股神畢菲特都押注千億喺再生能源項目，咁多大佬照住，萬裕想窮都難。最後，萬裕大股東紀楚蓮家族持股54.4%，基金DJE持股7.99%，連同其他細fund，實際街貨市值只得一兩億，貨源歸邊指數達十粒星，能控盤也！
送多份甜品畀你，每股NAV3.26元，現價六折大平賣，連續兩棍爆上，兼有成交配合，睇幾多？等市場話你知！
唐牛
https://www.facebook.com/tongcow88
唐牛
魚樂無窮 - 唐牛 舊文
