女神tea time：博洗衫板有後續
■彩虹電子H股市值約5.6億元。 資料圖片
牛市時有好多獨有現象，包括全民皆股、少年股神湧現等，今次呢一浪衍生多個現象，就係新聞主播轉行加盟券商。女主播樣靚，形象專業，加盟變相為券商做宣傳。眼見最近加盟券商嘅主播BB，密密上娛樂版
，係咁接freelance，出席一啲唔關財經嘅活動，話題係有，但似藝人多過財金界人士，仲要係負面新聞主導，睇嚟間券商要努力多兩分幫主播BB洗底先得。今日推介彩虹電子（438），市場暱稱「洗衫板」（438的諧音），為央企中國電子信息集團旗下，聽到央企大家即時自然聯想到重組呢兩隻字。首先，內地國企正積極籌備混合所有改革制，中國電子信息旗下有12隻A股上市公司，5隻H股上市公司，仲要唔係間間做得好。於央企改革大勢下，中國電子信息自然要清理門戶。
彩虹電子原本負債勁，不過今年2月公佈資產重組交易，將所持A股彩虹公司13.5%賣畀咸陽彩虹，代價為約9億元。彩虹公司係一隻ST股，連蝕多年之餘仲要高負債，今次出售後，彩虹公司唔再under彩虹電子，冇咗負累，彩虹電子即時輕身上路。母公司有心將彩虹電子封返靚仔，我唔信冇後續囉。
彩虹電子H股市值約5.6億元，連同內資股市值約20億元，對比同系公司市值最偏低。隻股股價近期蠢蠢欲動，買定博有好消息。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
