異動空間：股票倉入咗ICU
港股每日隊兩三嚿，唔算恐慌，但個股已被打到內傷，唔好彩揸咗新確科技（1063），半個月輸七成，即使大時代信念未動搖，諗住死坐返家鄉，但浪費的機會成本絕對無法彌補，故本欄一直強調15%止蝕的重要性，因只要一次失誤，個倉入咗ICU，之後要贏番N咁多鋪先有望收復
之前失地。炒開股票都知，輸咗鋪傑嘅心靈創傷更大，有冇信心繼續炒落去？心急想搶攻隨時越輸越多。這時候只能縮注碼，先食幾鋪雞糊，務求打番起個信心再逐步追數。如此折騰何不day one就嚴守紀律，以防虧損擴大？
樂觀去睇，目前慘況與2007年7至8月接近，即係狂野派對前的最後大震倉，捱得過呢轉就有運行。但經驗所得，最後一段路資金主力推高指數，要揸中大價股先食到條水，如不幸買咗「數字亡國」揩緊六、七成，即使恒指去到三萬八，隨時都返唔到家鄉。更大問題是，你能肯定瘋狂派對短期會來嗎？最後睇嚇泰坦能源（2188），近日完美跑贏大市，皆因國策力撐電動車，充電樁一定要周圍裝，先多人會買電動車，泰坦潛力甚驚人，短線有力挑戰前高位1.7元。
魏力
http://www.facebook.com/2012jason
魏力
異動空間 - 魏力 舊文
