撈底不易
2015/06/17 09:16:22
網誌分類: 經濟
美股連跌兩日後，昨日反彈。杜指漲113點，收報17904點，漲幅0.6%；標普500指數升12點，收報2096點，漲幅0.6%；納指升26點至5056點，漲幅0.5%。
希臘問題繼續係國際市場焦點，到目前為止，幾乎睇唔到任
何表明希臘與金主可以達成協議的跡象。希臘財長瓦魯法基斯昨日表示，希臘並無計劃在週四的歐元集團會議上，提出新的改革計劃，仲堅持要求國際債權人認真對待希臘提出的改革計劃。市場人士已經越來越擔心希臘將會出現債務違約，最終給踢出歐元區。究竟係唔係咁，要等埋今個月25日舉行的歐盟峰會，至有分曉。不過，睇美國及德國10年期國債息回落至2.3厘及0.8厘樓下，遠低過上周的2.5厘及1厘，即是債價上升，反映有更多資金流入債市避險。
希臘債務好大機會爆煲，不過市場的反應已經唔係幾年前歐債危機時候咁「騰雞」，股市跟住消息上落，但不太恐慌。相信投資者覺得歐洲領導人已經有處理希臘問題的經驗，防火牆已經做得比較好，另一個原因，見到希臘問題傾來傾去都無結果，已經有點麻木。適逢聯儲局正在舉行貨幣政策會議，投資者的注意力轉移到儲局幾時開始加息議的問題上。有關希臘債務談判的壞消息，就先放埋一邊，畢竟，聯儲局的加息動向，對大市的影響比較直接。
聯儲局公開市場委員會（FOMC）仲有一日會開，今日將發表議息聲明，而主席耶倫亦會召開記者會。London Capital Group首席分析師布凱麗(Brenda Kelly)表示，「在這個時刻，儘管貨幣政策方面不大可能發生變化，但耶倫可能會以更加激進的姿態登場。」即係話，即使9月份唔加息，今年年底加息的機會將會好大，並可能作出暗示幾時加息。果真如此，美元匯率又會得到支撐，大宗商品受壓。
美股反彈，內地股市就大大鑊，上證綜指昨日勁插3.4%，收4888點，失守5000點大關。引發昨日暴跌的主要原因之一係未來4個交易內，將有25只新股發行，係歷來最大規模申購潮，預計凍資可能超過6萬億，巨資凍結，股市易跌。
另外，中證監昨日重申，證券公司不得通過網上證券交易介面，為場外配資提供便利，又聲言會嚴查場外配資，這種去槓桿的措施，會進一步加劇市場資金的緊張程度，水頭唔夠，個市就跌啦。要注意的是上證綜指昨日跌穿上一浪（5月27日）的高位4942點，要去到4600點附近至有比較大的支持。內地股市繼續跌，港股亦會受到拖累。
跌跌不休的中國中車（1766）
，繼續成為市場焦點。中車A股由本月9日復牌日的高位35.64元人仔，跌到昨日的21.58元，5個交易日股價唔見咗4成，A股市值蒸發超過3000億。H股復牌日高位一些，只有15.9元，但跌幅都超過30%！ 由於中車唔係純粹炒股，而係有實質概念支持的大股，所以夠膽撈底的人特別多，愈跌愈撈，所以殺傷力特別大，死的人更多！
對於中車復牌後連續數日暴跌，高華證券分析師認為，中國中車A股/H股目前對應的2016年預期市盈率為53.3倍/21.7倍，而全球鐵路裝備同業的2016年預期市盈率中值為12.9倍，故存在A股估值偏高的現象。
從「投資的我」的角度，無論大摩也好，上述高華證券也好，都講出中車的市盈率跌咗好多仍有偏高，特別係A股較貴，所以未係投資的時候。
至於「投機的我」，就係一個五五波的估計，股份愈插得急，再深插和急彈的機會一樣咁大，好似賭大細一樣，但中車蟹貨好多，怕佢反彈都未必彈好長，彈完還要尋底。如投機設一成止蝕，怕佢一兩日又到，怕到時又要打靶，結論係撈底不易。街外其他股開始都便宜，投機買啲無咁弱的股票好啲。
陸羽仁
回應(4) 我想回應
陸羽仁 BLOG 舊文
