中環在線：彈Apple Watch對佢無用
蘋果創辦人用三星手機
■Wozniak話手錶係用嚟睇時間，但Apple Watch對佢嚟講唔係手錶。 李潤芳攝
世界商業論壇噚日首度移師香港喺灣仔會展舉行，重磅演講者包括蘋果公司另一位創辦人沃茲尼克（Steve Wozniak），咪以為佢一
定唱好蘋果產品，Apple Watch唔係佢杯茶不特止，佢仲用緊蘋果對手三星嘅手機㗎！
噚日現場有位眼利嘅男士望到Wozniak手上戴住一隻黑色厚身手錶，明顯唔係Apple Watch，佢直接問Wozniak點解唔戴，全場亦即時起哄。
■Wozniak（左）當年同喬布斯（右）鍾意吹水講理想。 黑白圖片 常與喬布斯講理想
Wozniak笑住話問得好，隨即搵行政總裁庫克（Tim Cook）做擋箭牌，話「我有收到庫克嘅短訊，話員工（佢仲係蘋果員工）買錶有五折，上去蘋果App Store睇，想買隻鋼帶款嘅Apple Watch，但有成廿幾款咁多，真係唔知點揀！」
Wozniak認為，買手錶最重要係睇時間，Apple Watch對佢嚟講，既唔係手錶，又唔係純智能手機。最重要係，Wozniak係Android粉絲，佢噚日都自爆，用緊三星嘅智能手機，所以要佢買Apple Watch真係得物無所用。
講完之後，可能佢怕果粉唔鍾意，隨即大讚Apple Watch嘅偵測血壓、心跳功能冇得彈。
64歲嘅Wozniak又話，如果當年冇遇到喬布斯，佢可能好似一般人咁，畢業去做教師，唔會有機會企喺台上演講。
外界經常形容喬布斯難相處，佢為喬布斯辯解，指佢事事追求完美嘅性格，係喺蘋果創立後慢慢演變而成。Wozniak形容，喬布斯係科網界嘅沙士比亞，總有辦法力臻完美。佢透露，當年兩人走埋一齊鍾意吹水講理想，「我實際啲，最想搵份工賺錢；佢反而比我更hippie，會諗點樣令世界更好。」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
