滙海探戈：希臘衰冇誠信
上周金融市場風高浪急，港股俾A股綁上烈火戰車，好多細股幾日間跌七八成，之後兩日雖收復唔少失地，但低位壯士斷臂的大有人在。阿爺維穩下A股近日喘穩，但手法相當拙劣，竟出動公安查所謂惡意沽空，即係淡友隨時要拉要鎖，假如個市之後又唔生性，阿爺恐怕無所不用其極，就算最後
安然度過，內地股市要同國際接軌，睇怕仍然係好遙遠嘅事。
而另一邊，歐盟財長昨日繼續開會討論希臘援助問題，雖然希臘禮拜四交出份方案，在削減養老金同增加稅項上面作出讓步，但由於佢哋之前太過反口覆舌，區內部份國家唔係咁信佢亦唔係咁想再幫佢，市傳德國佬更要求希臘作出更多改革承諾，甚至要求希臘未來五年暫時離開歐元區，執筆時歐盟宣佈押後原定昨日舉行的領袖峯會，直到昨日重開的歐元區峯會就希債問題講掂數為止，估計單嘢要拖多陣先有定案，歐洲股滙短期料繼續chok。
減息陰霾下 加元捱沽
上周環球股滙的投資者似乎擔心A股多過希臘，但歐元上周五反彈130點子收1.1166美元，主要受到債權人對希臘方案看法正面消息推動，家陣單嘢又再波折重重，歐元今日隨時打回原形，喺未有最終結果前，歐元料會在1.09至1.11美元徘徊。另邊廂，國際油價上周大跌逾7%，加上市場炒作加拿大本周三減息，拖累加元上周曾跌至四個月低位，低見1.2780兌1美元，若央行真的減息及油價續跌，加元恐怕再跌一跌。
奇兵
本欄逢周一刊出
奇兵
滙海探戈 - 奇兵 舊文
