一周三件：重慶行等爆上
■重慶銀行是內銀股中，估計盈利增長速度最快的一間。 資料圖片
重慶銀行（1963）喺內銀股中，估計盈利增長速度最快，又就算計埋潛在攤薄，重慶行仲係比行家平均PE，平咗30%，追番行家，重行已經講緊要升40%過外。重慶行啱啱上月尾宣佈配股，但撞正呢個月頭中港股市
大調整，計劃中配股價7.65元，重慶行現價（7.36元）仲係潛水。仲要咁睇，重慶行呢次計劃配股，講明配售畀包括生命人壽、中融、世茂（滬600823）等中資超級大孖沙。諗到嘅係，就算重慶行落實配股，中資大孖沙係有實力，肯坐貨。
預測PE平絕同業
重慶行未計入配股攤薄，場內專業評估該行今、明兩年EPS1.43元同1.6元，預測PE5.1同4.6倍，明年預測PE場內至平。而喺重慶行宣佈配股後，各大行即時adjust重慶行EPS，就算以6月尾到家陣，場內計埋攤薄評估，重慶行今、明兩年預測EPS1.37同1.55元，明年預測PE4.7倍，仍然係場內最平選擇之一。行家今、明兩年預測平均PE講緊7.34同6.78倍，重慶行平咗截。同樣以經攤薄反映計數，重慶行明年EPS增長高達13%，排第二係重慶農村銀行（3618），明年EPS增長11.4%，招行（3968）11.24%，重慶行盈利增長預測，又係行內最爆炸！
重慶行對口係重慶市國資委，基地係重慶。之前主打重慶機電（2722）提過，重慶市單係為咗配合一帶一路呢個重中之重國策，計劃投放上萬億元人仔，喺市內大型基建。又連同汽車或其他高端產業，目標2020年時2.2萬億元人仔規模。重慶行食住基地一帶一路投資，同本市發展動力，加埋本身喺市內實力，嚟緊日子，肯定有運行。煲重慶行，當追番上行家明年平均6.8倍PE水位，重慶行已經講緊要升44%，到10.6元。
錢雋
細價股專家
本欄逢周一、三、五刊出
錢雋
一周三件 - 錢雋 舊文
