笑到最後：港股向左走向右走
上星期股災，一如常人，高明只係驚訝跌勢咁強勁，然後去瞓晏覺，冇意識到大跌就係機會，正如畢菲特引用佢師傅價值投資之父格拉咸所言：不論係買襪子定係股票，佢哋都會選擇大減價時購買。星期三就係要貨唔要錢嘅清倉大減價，本欄冇衝入，第二日都冇，股齡太短，風浪見得不足，
亦足證本欄仍只是一介偶像派。
回到正題，大升大跌冷靜過後，之後港股會向左走定向右走？高明覺得，首先要由A股講起。A股救市套餐，官股入市都係少事，為咗維穩，政府做儍仔死頂，外資見到開心都嚟唔切，何況低位入貨，政府長線未必輸。最錯係停牌救市，同埋沽貨者要買返。
續成外資天下
對於買嗰一方，停牌等同買股嘅人要有全輸準備；沽貨強制買番，即係你嘅錢並唔係你嘅錢，第一步向高層埋手，癲起上嚟連散戶都唔會放過。兩個動作都只會令智力正常嘅人撤離，至少將錢搬到美元區，例如香港，得番愛國愛黨會瞓身買A股救國。
不過咁唔代表A股一定會跌，因為以中國不顧一切救市手段，中國夠膽停剩一隻中石油A股嚟任挾，為附合領導指令，中國絕對做得出。A股最好情況係，用行政手段造到個市升；最壞情況就係股市完全失去融資功能，甚至連抵押股份都唔受，資金又流走，得返好似鍾樹根、蔣麗芸咁上下智商嘅人留喺A股市場。
至於港股，時光倒流到復活節後大升，當時中國人甚為亢奮，話要喺鬼佬身上搶返「定價權」，當時A股如日中天，「農村包圍城市」但估值依然無法超英趕美，今日A股係敗軍之將，又點搶？
亦有一說，阿爺要炒高H股救市，用城市包圍農村，但高明認為冇可能，先唔講中資技術上點戰勝外資，共產黨員都係人，見股市升都會心雄，跌市蟹得多過我同你，國家隊救市維持社會穩定只係口號，讓領導先走先係行動最大理由，AH兩個火頭蟹緊，A股大咁多，一定係優先救A股，炒高H股無故益街坊，違反黨性，唔係共產黨所為。
港股經過過去3個月，至現水平，等於冇牛市，冇股災，本欄預言，港股繼續係外資天下，恒指重回4月前，升唔爆廠，跌你唔死悶局，未買貨唔使急買，有貨都唔使急掟。過去3個月，大家可以當拍咗場中外合營大片，由你做主角，雖然你個角色係一個茄喱啡。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
