金手指：一注獨贏靄華
■若無人為股災的話，相信靄華押業的股價應該已有3.5元。 資料圖片
上周二大鑼大鼓叫大家「不問價追摩比（947）」，仲要同大家話我連老婆本都瞓埋落去。今日我可以同我條女話：「有錢娶妳做我老婆仔啦！」但我條女始終係港女，未必會完全滿意我嘅建議，即係喺聯邦大酒樓擺酒
，故今周繼續努力！
街貨落在強者手
入正題，今日叫大家一注獨贏嘅靄華押業（1319）有幾個原因。首先佢股價其實喺4、5月瘋牛中近乎冇鬱過，係要去到大市開始跌嘅6月先因業績帶動升。佢做乜唔使多講，就係做比較高利息嘅貸款，簡稱高利貸。息低大家都知，問題係你借唔借到。高利貸而家係喺完美位置，雖然息低，但因花旗國永遠都話將會加息，監管機構就會落瘋狂壓力落啲有系統性風險嘅金融機構例如銀行，用行政手段逼減借出金額（唔信問嚇曾司長）。啲客就被迫搵例如靄華押業，亦因息低，呢啲冇系統性風險嘅金融機構融資成本亦會低，令毛利率非常堅挺，業績靚。
呢個周末同十億元身家老炒家朋友傾，當我同佢講呢隻時佢話：「你一定要睇佢嘅股權變動。」大股東喺7月人為股災前不斷增持，同反彈後嘅現價差不多。睇披露易，最大四個股東已持有差不多八成股權。但更重要係佢出至2月尾全年業績時，宣佈一股送三股，變相拆細。8月初除淨，兩周後先送股，即會有兩周街貨流通量跌到得冇百分之六。公司得13億元市值，即若百分之一百冇其他人儲貨，都係到時得幾千萬元街貨。
最重要係上周嘅人為股災（國家隊被要求買貨，就算可無窮無盡、零息咁借，都要還本，即要對沖。大陸市場禁拋空及沽期指，唯有來港沽售對沖。我好愛國咁用賤價接貨等攞紫荊勳章），相信令街貨跌落去好似老炒家呢啲強手中。當市場個個見到呢個局，就會鬥忍手唔沽貨。我相信唔係股榮兄話齋嘅人為股災，靄華押業應該已3.5元。快啲多謝國家隊，快速短炒，一注獨贏靄華押業！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
