笑到最後：港交所逐步人大化
一連三篇講政策唔貼股，只係因政策對於投資市場影響太大，有咩政策，就有咩股市，純粹追逐冧巴而對投資政策冷感，除咗係離地股民，更加會俾股票不斷玩，遭受制度暴力。就好似當年搞到滙控（005）被大行合法造市mark低嘅勁假時段，港交所（388）今日再度硬推，因當年
禍害太深，合法造市，坊間都幾難搵到人撐。
所以有公關向報章放風，話港交所咁做係被外資基金逼。呢啲風明過李小加同志一戙。因中國早已係強國崛起，香港亦都回歸中國，港交所由中國人話事，放呢啲風嘅人一係明示李小加冇實權；一係暗示港交所內有西方勢力代理人滲透，暗插某海歸話事人。
漠視反對聲音
港交所諮詢中，回應以140份支持對299份反對，絕大多數反對。奈何港交所已人大化，漠視反對聲音，只係用語言偽術話反對者未能核實身份耍開，更為支持力度作出僭建，自稱獲強烈支持。李小加披住海歸金融專才外衣，骨子裏都崇尚人大式舉手機器。點解要硬推，港交所辯稱「國際上除香港外，所有成熟的證券市場均已採用收市競價有效地執行收市交易」，呢句一睇，港交所打工班小農竟然咁樣讚自己。
港股本來係成熟市場，但因有港交所令到香港淪為第三世界市場。因港交所無一流人才，處理反對理據嘅方法，只係第三世界部落級管治。
一個正常成熟市場，就係容許正反雙方作出辯論，透過理據說服對方，從而作出最後決定。既然數字上絕大多數人反對，一個成熟嘅交易所會想盡辦法了解反對者諗法，然後用理據去說服對方，令對方轉為支持。但李小加呢班著住西裝扮文明嘅人，冇實力去說服反對者，連面對反對理據嘅勇氣都冇，抹去大多數反對聲音，仲要塗脂抹粉話強烈支持，十足十中國式一言堂。證明港交所係擁抱毛澤東價值，多過國際慣例。但我想提醒李小加，你偶像毛主席講過，中國屬第三世界國家唔係成熟市場。由當股市係耕田鬥多嘅延長交易時段，到A股化嘅停板機制，再到抹煞反對聲音嘅勁假時段諮詢，李小加帶領港交所走中國路，支持港交所依法行中國路，尤其是人工，絕對唔可以走美帝CEO貴價人工加認股權路線，李小加同志你份人工唔該同返中國接軌。
高明
即上偶像派財演高明專頁：
https://www.facebook.com/bigricetea
本欄逢周一刊出
高明
笑到最後 - 高明 舊文
