魚樂無窮：蓄勢待發盈喜股
■在網媒崛起下，紙媒近期出現整合潮。 資料圖片
在網媒崛起下，紙媒近期出現整合潮，但財經雜誌卻有另一番光景︰上周再有新財經雜誌面世，姑勿論內容及質素如何，大時代結束後仍有人泵水大搞，證明市場潛力無限。
放諸股市道理一樣，雖然成交再創近半年新低，死氣沉沉，但每
日依然有逆市奇葩出現，只要肯做功課，一樣可以撲中。績優股惠理（806）上周五炒高7%，成交逾億元，仲要由頭升到尾，巴閉！想搵下一隻惠理，我會揀中生聯合（3332）。「惠理係基金，中生聯合做保健品，牛頭唔搭馬嘴喎！」冇錯，業務風馬牛不相及，但股價同業績卻非常相似︰7月齊齊出盈喜，但在陰乾市下，股價竟跌穿盈喜前水平，名符其實賤物鬥窮人。
中生聯合主打營養健康品，預計上半年盈利增長四成，按按計數機，市盈率將跌至十餘倍，比起A股同業動輒百倍計，可謂平到飛起，一旦成功回歸A股，肯定升價十倍。公司今年先後與太平洋保險及復星合作，大搞網上平台及海外併購，前景一片光明，現價息率接近五厘，有升有息也！
事實上，唐牛曾於7月底推介中生聯合，當時股價3.62元，最高升見4元，升幅約一成。上周五收報3.2元，比上次推介再低逾一成，配合本周五公佈業績，值博率有幾高，唔使講到咁白啦！
唐牛
https://www.facebook.com/tongcow88
唐牛
魚樂無窮 - 唐牛 舊文
