笑到最後：
歡迎進入大型悶熊
首先，中國天津大爆炸事件，希望遇難者安息，同時，亦希望當局會善待遇難者家屬。本欄曾寫過港股進入「港女市」時代，升唔升得多但又跌你唔死，但係經歷星期二，呢個睇法要轉一轉，高明認為，港股已經進入大型悶熊市。
上個星期二本來係打破港股悶局契機，之前多日都守得住24000
點，等待原因爆上，可惜原因係人行官方貶值。但凡升市原因唔係嚟自基本因素而係中國政策，一定係好消息出貨。
平時再弱嘅反彈都有一兩日貨仔。上個星期二最壞嘅係中外大戶食相肉酸，見有升就喪掟貨，不顧情面，下次再大反彈亦一樣。
用返港女做例，之前升市炒高，鬼佬同大陸佬都送咗好多嘢畀個港女；而家大陸佬鄉下間廠有事，走咗佬一次，竟然返轉頭，問港女拎返啲禮物去當。嗰啲窮鬼佬亦都間唔中問港女「攞家用」。今次難得大陸佬同鬼佬齊心，當港女係提款機，一定唔會一下子食盡，而係慢慢陰乾，所以，個市將會係大型悶熊。
中國國運由盛轉衰
另一個原因就係國運。早年三星電子產品一度打贏美帝蘋果，南韓任何嘢都橫掃全球，包括求其搵個阿叔唱歌跳舞，一樣可以紅到全世界。高明喺未有更科學解釋前，叫住呢個做國運。
中國亦都一樣，之前世界工廠，大國崛起，到呢兩年自覺同美帝平起平坐，繼而A股強絕全球、一帶一路、亞投行圍堵美日。點知A股股災，中央做乜都錯，冇咗支神仙棒，加埋突如其來天津大爆炸同東莞地陷災難，連運都輸埋，中國「國運」由盛轉衰已經開始緊，每次中央出手都係內幕者出貨時機，亦都解釋咗上個星期二恒指單日升400點都要打返倒跌收。
至於中國國運點解轉弱，因為唔信過去成功原因——香港。自清朝以嚟，香港一直幫中國做對沖：中國弱，香港勾結外資為中國撲水；中國強，香港為中國出口、上市集資。一個國家兩種貨幣同制度，好好利用香港，大國崛起不是夢。
偏偏有人覺得中國崛起係自己勁，同香港無關，近年香港只佔中國GDP3%，可以踢埋一二邊，再搵件二打六去做特首，矮化香港為中國三線城市。喺中國未有能力直接跟國際接軌前，打冧香港，只會令依靠香港崛起嘅某一強國，命運同香港一樣，重回第三世界國家之列。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
