異動空間：留意呢一個日子
經歷A股昨日瘋狂過山車走勢，可進一步確認3600點為救市底，一穿點都托上去，即係短期繼續3600至4000點之間上落。有戰友問道：阿爺係咪可以頂一世？理論上可以，因為銀紙可以無限印，唔會冇彈藥，但這如同QE救股市，人仔會大幅貶值，後果不堪設想，阿爺應該唔會咁
做。有同事指出要留意一個日子：9月3日，呢日為習總閱兵，面子問題點都要托到嗰日，之後就好難講。
由大陸媒體報道可知，阿爺救市板斧買少見少，國企改革概念散水了，連千億逆回購都冇反應，只好再出MLF，定向對銀行放水1,100億元人仔，午後再吹風會降準，個市先見明顯反彈。憧憬從來都是救市良方，一旦真的降準了，個市隨時再隊過，到時阿爺就頭痕了。
A股托得起，港股好似啪咗丸，冇哂反應，反映外資根本唔信大陸拆得掂，你托我就沽得舒服啲，3點後A股收市就再掟得狠啲，撤退決心無比強烈，何解？相信係擔心中國經濟已硬著陸，出現經濟衰退。「GDP唔係仲有7%？」你仲信的話就真係輸了。望嚇中石化（386）張圖，資金已用腳投票了。
魏力
http://www.facebook.com/2012jason
魏力
異動空間 - 魏力 舊文
