中環在線：領匯改名領展想洗底？
高層話希望與商戶拉近距離
■領展行政總裁王國龍因為喉嚨痛，噚日失聲，只能企定定同領展logo合照。 伍嘉亮攝 
領匯（823）終於拜拜！大家唔好誤會，唔係政府願意回購領匯，只係領匯正式改名為「領展
」，英文名亦由The Link簡化為Link。
領展自從2005年上市以來，一直被指瘋狂加租、逼走小商戶，其實在商言商，佢作為上市公司，加租、優化商戶組合都係合理之舉，小股東所收嘅股息年年有得加，更加係求之不得。
不過，領展旗下商場不停加租的確係事實，總會令部份人唔高興，所以每年領展喺酒店舉行股東會，總有人走去示威，幫小商戶出頭，甚至有人要求政府回購番領展。
好多人覺得運滯都會走去改名，可能領展都係希望改名後，人緣好啲，俾人鬧少啲，於是決定改名，希望順便洗底喇。
官方答案當然好正經，企業傳訊及對外關係總監盧炳松強調，管理層從來都冇諗過要洗底，只係想有多啲形象，跟市民與商戶拉近距離喎！
■領匯舊logo 麥玲玲：「展」字利房產
佢解釋，兩年前開始計劃改名，主要因為發現內地有廿幾間機構註冊咗做「領匯」，有間內地公司甚至開價1,500萬人仔，出售領匯呢個商標，佢哋考慮過後，為免喺內地發展時惹上官非，索性改名兼換品牌設計。盧炳松補多句話「就算改咩名，我哋都唔會忘記過去」。
風水師麥玲玲認為，領展呢個名都算改得好，根據姓名學推算，「展」字對人緣有利，將來名聲會轉好，而且「展」字屬火，火土相生，有利房地產發展。之前所用嘅「匯」字，屬水，公司做金融業先至受惠咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
