一周三件：合豐脫穎而出
■合豐今年上半年，集團盈利增長5倍至1,070萬元，圖為集團主席許森國。 資料圖片
合豐（2320）啱派半年成績單，盈利一枝箭增長5倍，食住網購大潮流，主打瓦楞包裝瓣數，繼續有運行。而集團兩個月跌近50%，去番2月開波位，有得諗。
合豐主打瓦楞芯紙、紙板同紙箱
產銷。今年上半年，集團盈利就增長5倍到1,070萬銀。上年同期，合豐盈利得175萬元，基數低，形成今年半年盈利增幅咁爆炸。但咁睇，祖國輕工業慘淡，加埋環保要求，合豐喺呢場淘汰戰中，脫穎而出，keep住增長，半年盈利兼超過上年全年實際盈利。又加埋生產流程改善，合豐毛利率，亦由上年同期17%，提升到呢期19%，好靚仔。
紙廠受惠快遞業務
國家郵政局數據，今年頭七個月，祖國快遞累計完成101億件，同比增加近44%。業界估計，隨住下半年雙11光棍節、聖誕等等，全國遞業務量將達到200億件。網購潮流下，合豐食到應。同樣，唔計上年出售鳳崗合豐紙品廠所獲非經營收益3.8億元，照計合豐今年實際盈利增長，keep住斷倍增長。
合豐現價（0.57元）得0.3倍PB，好似上邊講，集團上年出售鳳崗紙廠，廠房身價一釋放，錄到收益3.8億元，幾乎等於集團總市值4.6億元。而鳳崗紙廠出售後，合豐家陣仍然揸住三間廠房，呢批廠房，好似鳳崗紙廠咁，禾桿冚珍珠格，連埋潛在增值反映，合豐實際PB仲低！
上周五，合豐40球成交股數，聞到有味，煲轉合豐，當上番100日線0.76元計，潛在回報率30%，到時，合豐PB都係得0.45倍，都仲未有耐去到10年平均歷史值0.84倍水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文
