中環迷你裙：落注見證大時代
■本周議息已不僅是個中環熱話，連牛頭角普通師奶都知。 資料圖片
聯儲局議息有幾大件事？它已不僅是個中環熱話，連牛頭角普通師奶都知本周議息。屋企樓下個看更阿姐都問，「阿妹，咁到底今個禮拜加唔加息箒？」阿姐思維是，加息咪大鑊囉，唔加息咪仲有戲唱囉
。Samantha看法是，加息個市要死，但唔加息會死得更慘。聯儲局基於維持自身credibility，今次唔加，年內都會加，成日憂住加唔加息，明顯是個不明朗因素，睇唔透向來是股市的死敵，第四季注定冇運行。
加息嘛，或者會令全球陷入通縮，美國成千古罪人，好處是醜婦終須見家翁，加息呢啲好豐儉由人箒，就算八分一厘都係加息吖，做咗嘢㗎喇！
2015年無疑是個大時代，落注可感受大市脈搏，Sam上月睇死阿爺救市，越救越死，怒沽H指，今次則看淡藍籌友邦（1299），該業務覆蓋18個市場，甚受外圍影響，第二，上月才跌穿四年的上升軌，還有下試空間，第三，昨日一支陰燭插穿20日、10日線，技術上明顯走弱，沽得！
注碼不一定要大，但押注能增加與大市埋身肉搏真實感。「神級」八爪魚保羅押注世界盃都唔係鋪鋪贏喇！冇人是長勝將軍，但Sam知道，揀錯方向都可反敗為勝，下集再講。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文
