中環在線：賭場嫌屋企人豪飲豪食
詹培忠罷去賭城3年
■詹培忠一行20人，喺賭城豪飲豪食，食咗十幾廿萬美金。
有「金牌莊家」之稱嘅詹培忠除咗炒股厲害，賭術都相當高明，早幾年，幾乎每年年尾都聽見佢老人家，話同屋企人去賭城美國拉斯維加斯玩幾手，聞說佢好多時都大有斬獲。但近幾年好似少聽詹培
忠報告戰績，除咗佢之前講過話冇乜興趣賭之外，原來仲有另一個原因㗎。
一餐食十幾萬美金
詹培忠自爆，有年聖誕節同屋企人去拉斯維加斯賭錢兼放假，點知間賭場竟然話佢屋企人「大食」，有「潮州怒漢」之稱嘅詹培忠馬上怒起來，決定抵制美國賭城3年，所以呢幾年詹培忠都冇去美國賭錢。
件事其實係咁嘅，近年越來越多賭場開幕，各大賭場都想盡辦法搶VIP賭客，都不外乎以包私人飛機接送、豪飲豪食豪住等作招徠。咁其實你情我願，做乜話人「大食」先？
身為VIP嘅詹培忠都話，佢每次去賭城，唔使帶現金，因為每個賭場都會有300萬美金嘅額度畀VIP，詹培忠專心賭百家樂嗰陣，同行嘅屋企人就喺賭場嘅餐廳飲飲食食。
初頭以為佢一家幾口食得幾多吖，點知詹培忠笑住話，佢哋一行共有成20人，一餐可以食成十幾廿萬美金，華華聽到都O咗嘴。
詹培忠見華華O嘴就解釋埋落去，指賭城嘅餐廳一般都mark up好多，一支紅酒閒閒哋都過萬美元，20人食十幾廿萬美金都唔過份。詹培忠仲話，抵制之期今年屆滿，但就冇講會否再去喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
