金手指 - 孫柏文 2015年9月22日

金手指 - 孫柏文 2015年9月22日


金手指：
為李小加平反


■《華爾街日報》指責李小加於摩根大通中國任主席期間，向摩通推薦大陸官員及富二代。　資料圖片

大家作為本欄fan屎，都知孫柏文一向係反李小加陣營中之中堅。2011年，未喺有線醉酒出事前（今周係「醉酒事件」四周年），我曾經因港交所（388）批准高盛唔履行窩輪條款，喺節目叫佢滾蛋。

喺faceBook已有1,800名會員嘅「反停板」頁我有份做管理員，我有份嘅獅子山學會，早排都喺畢打街度掛咗幾塊街板，簡單擺咗李小加個嘜頭同引述佢句經典話：「A股是世上最安全、最透明！」

國情要尊重
不過今日我真係想為一篇《華爾街日報》報道嘅指責，幫李小加平反。相信大家都知李小加被踢爆喺摩根大通中國做主席時，向摩通推薦大陸啲官、富二代。

首先，李小加作為一名員工，首要條件係要向公司盡責。投資銀行就係要搵錢，合唔合法就法庭決定。如果只要畀啲官、富二代一張寫字枱同印有公司logo嘅卡片，就可以有生意，點解唔做呢？

你要明白呢啲係國情，李小加請香港高官小朋友去贏取香港政府嘅生意當然要拉兼入獄，不過李小加同呢啲官、富二代都係大陸人。如果因為咁，大陸啲單位要忍受摩通收貴價畀生意佢，輸嘅都係大陸同胞納稅人。國情，就係咁解。

尊重境外國情，根本就係香港的核心價值。我哋覺得人之常情嘅嘢，唔可以「監粗」迫人哋接受，我哋亦要向境外壓力說不。例如我哋一向尊重私隱，包括錢嘅出入，就唔可以俾美帝、大陸透過證監新草案侵犯。大陸興官員子女就業機會換政府生意，我哋亦唔好向佢哋指指點點。

李小加要滾蛋，滾離港交所，真係有一百幾廿個理由，不過唔係呢個。李小加講得啱：「摩根大通內部有一套正式的處理程序，我完全按照程序辦事。」當然，如果花旗國政府話要因反貪，引導李小加受審的話，我對香港司法制度的一套正式的程序處理這些事情，非常有信心呀。

孫柏文
獨立股評人
http://facebook.com/shuen
本欄逢周二刊出

孫柏文
金手指 - 孫柏文 舊文