中環在線：
乖仔與法興同事結婚 君悅擺酒
彭醒棠11月娶新抱
金管局副總裁彭醒棠（Peter）係咪明年退休嘆世界，將要留待官方公佈，但呢位彈得唱得、為人親和嘅金管局高層，就鐵定今年11月底，榮升新老爺嘞。佢喺法興任職利率工具銷售嘅寶貝仔Karon，將迎娶同任法興嘅美人歸。
華華早前
喺財資市場公會峯會碰見Peter，即刻上前道賀，彭副總即時笑到見牙唔見眼，頻說「梗係開心喇，心願達成，最好遲啲抱埋乖孫喇。」
唔講唔知，咪睇Peter外表洋化，又吹色士風，又彈低音結他，唱英文金曲仲繞樑三日，原來佢最大心願相當傳統，就係寶貝仔同女朋友快啲拉埋天窗，之後最好三年抱兩。
華華跟佢相識多年，每次見到佢，例必問佢「榮升老爺未？」佢多數笑笑口咁話「唉，仲要等呀。」今次終於俾佢等到。一對新人將於11月底，喺灣仔君悅酒店筵開多席，宴請親友。
經常同囝囝夾band
講番Peter兩仔爺，佢兩位全無代溝，同樣熱愛音樂，經常jam歌夾band，Peter彈電子結他或其他樂器，阿仔就打鼓和應。
彭醒棠之前擔任按證公司總裁，每年都會搞一次「音樂之夜」，按證同人、傳媒界與部份賓架都會踴躍參與，聯誼一番，輕談淺唱一個晚上。華華記得，好幾年前Peter都有父子檔夾Band表演。
早年嘅Music Night，尚未長駐中國嘅現任滙豐銀行大中華區一姐黃碧娟，與金管局另一歌王──副總裁阮國恒，都有出席，兩位皆是靚聲之人！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
