兩件一周 - 錢雋
重慶銀行 平絕行家
2015年09月25日
重慶銀行上半年盈利增10%。圖為董事長甘為民。(資料圖片)
重慶銀行(1963)食住地區優勢，盈利增長跑贏絕大部分行家，預測市盈率(PE)行內至低，加埋密籠，再跌要兜底。
重慶行今年上半年盈利18.4億銀人仔，升10%
，場內同樣主打呢個地區嘅重慶農村商業銀行(3618)，同期增長8%，重慶行係繼盛京銀行(2066)之後(半年增長28%)，增長最靚仔嘅內銀。
上周主打慶鈴汽車(1122)時提過，重慶今年上半年GDP增長11%，冠絕祖國，該省兼自行培育出十大戰略性新興產業。亦諗到係，新產業避免同其他地區惡性競爭，支持重慶地區高增長，亦激化資金需求，喺呢個優勢下，重慶行係長做長有。
場內專業評估，重慶行未計攤薄前，今、明兩年每股盈利1.36港元同1.49港元，現價(5.43元)預測PE得3.9倍同3.6倍，而明年預測PE，亦平絕行家。
重慶行已發行11.57億股H股，大新銀行(2356)揸咗4.58億股，或39.63%、另重慶力帆持有1.39億股或12%，真係街客貨量，唔夠五成，等值32億港銀咁大把。重慶行街貨市值細，又H股權益，相對其他內銀，密籠好多。
重慶行6月協議配股，每股配股價7.65元，同重慶行最新每股資產值差無幾，重慶行應該唔會調低配股價，平價配股，但考慮埋個市時風時雨，低吸勝算更高。重慶行質穿5.4元就收集，當上番呢個配股價，起碼講緊要升40%，明年預測PE，5倍咁大把。
作者為中細價股專家
回首頁
兩件一周 - 錢雋 舊文
