金手指：不問價追港視
■港視不計其他資產，淨現金及即時能賣的債券，減去所有負債後都已值2.2元一股。
幾年前，香港電視（1137）當年仲係叫城市電訊時，孫柏文曾經寫過一篇題為「一注獨沽城市電訊」。而計埋佢多次派息後，現價係低過當時。咁點解喺呢刻，我會掉轉叫不問價追呢？當年我叫沽係因王
維基一路都眼光好，由回撥到光纖都係點石成金。但我怕佢走去做式微嘅傳媒業，仲要大燒銀紙咁做會滑鐵盧。點知，我首先高估咗佢攞到牌嘅機會，更重要嘅係，我嚴重低估佢作為一個管理天才嘅能力。
信王維基的管理
點解係管理天才？今日經過《選戰》一劇後，邊個會話佢拍唔到劇？不過要畀市民呢種感覺又有冇傾家蕩產呢？完全冇。睇上半年公司現金流，電視業務基本已完全停頓，而佢哋亦最透明咁將劇集製作成本入埋賬，當冇渣拿都唔會再影響。
當然，王維基而家又嘗試創業，你買佢就好似做創投基金經理咁。你知唔知，其實創投基金買落啲新公司時，首要條件係睇管理團隊。我雖然睇淡網上購物，不過以王維基嘅管理天才，就算呢單唔得，睇拍劇嘅成本控制往績，佢仲可以試好多次。而又以佢嘅眼光，遲早撲中。
最吸引嘅地方係創投基金買落啲新公司度，買一蚊就得一蚊嘅嘢。不過港視呢？唔計其他資產，淨係現金同即時能賣嘅債券，減去所有負債後都已值2.2元一股。邊度做創投基金可以既買落有王維基創業、管理記錄嘅公司，仲要出9毫買一蚊嘅現金！上周有個基金經理話：「平時返工少睇啲冇廿億市值嘅公司，真係會走寶。呢隻要幫自己portfolio買。」
最後，我自己最擔心港視就係佢攞到電視牌，因真係會大燒鈔票，仲要係被政府用牌照條文迫燒。不過，連呢個都唔使驚，因佢每次好似有機會攞到牌就會單日爆升，如果真係堅料攞到牌，就係大家落車之日。所以現價冇得輸，第一站（今日見？）2.2元，不問價追香港電視！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
