魚樂無窮：好消息慘變壞消息
■金管局昨日為大時代以來首次向市場注資。 資料圖片
港滙強勢多時，多次觸及強方兌換保證，昨日終觸發金管局向市場注資，為大時代以來首次，執筆時共兩度注資，合計155億銀。股民聽到注資，本來開心到彈起，蓄勢瘋狂掃貨，但恒指走勢卻不似預期，午後宣佈首次注資時，恒指
跌幅明顯加劇，最後更以接近全日最低位收市，一場歡喜一場空。以往港元需求勁，總與港元資產需求如股市及樓市掛鈎，用番地球人嘅說話，即係熱錢湧港掃股掃樓。不過，今次港元強勢，市場共識為大戶沽人民幣換港元，發揮避險功能居多。大時代有機會重臨？難矣！
內地上月製造業PMI為49.7，失守50盛衰分界線，創3年新低，情況有幾差唔使多講。A股死守3000關，有形之手再次出現，內銀A股被硬托上去，肉酸程度達十粒星。現貨托得住，期貨卻現曬形，內地三大期指低水幅度介乎9%至13%，淡友擺明造世界，等閱兵後食大餐。一個國家，經濟股市廢曬武功，滙價前景如何，相信大家心中有數，港滙強勢絕非偶然。
阿爺唔掂，澳門亦岌岌可危︰上季GDP勁跌26%，政府更宣佈勒緊褲頭，緊縮開支，香港零售業更進行寒冬，認真牙煙。德國股神科斯托蘭尼講過，升市=資金+信心，而家兩樣皆冇，升市真不知從何說起。
唐牛
https://www.facebook.com/tongcow88
唐牛
魚樂無窮 - 唐牛 舊文
