異動空間：中銀穿位港股危
現在情況係：你知道唔對路，股市指數每日在跌，商品、股滙債市，統統都出了事，但究竟最大鑊係邊樣？不知道因當好多小問題夾埋，產生的化學作用就變成一發不可收拾。世界經濟一體化，美國三輪量寬，熱錢四圍搵食，炒起各類資產，如今聯儲局收水準備加息，全球大拆倉，即係借美元炒
其他資產的錢要沽貨還美元，以免日後美元加息要還更多，加上油價暴瀉中東資金大縮水，形成多年一遇、全球大戶齊齊沽貨奇景。
以前歐美唔掂，有中國高增長故事頂住，但四萬億元救市後遺症揮之不去，人仔升值搞到製造業及出口萎縮，想反其道而行谷股市救經濟，又控制不到槓桿而爆煲，唯有人仔暴力貶值救出口，但呢隻黑天鵝令人幣資產遭大舉拋售，外資沽貨套現閃人，大陸人驚人仔再貶，沽貨將錢泊落港元，令港元近日企於7.75強方水平，逼使金管局注資頂住聯滙。這猶如兩個颶風相遇，繼而引發的完美風暴。平時金管局注資多數係好事，代表熱錢湧港推高股市，但今次注資反而引起人仔進一步貶值的恐慌，中銀香港（2388）率先跌穿8月低位，或預示港股短期將穿位，向下再尋底。
魏力
http://www.facebook.com/2012jason
魏力
異動空間 - 魏力 舊文
