金融High Tea 2015年9月2日
無名腫毒跌一餐
2015年09月02日
仲有一日內地就進行大閱兵，港股周四休息一日，市場情緒本來比較觀望，指數軟軟哋，早段沽盤唔算太強，但臨近尾市指數突然插低，最直接原因係美股杜指期貨進一步急跌，歐股開市亦插。美股期貨插低表面理由係關注內地經濟放緩，實際係中美基本因素各有隱憂，無名腫毒都要跌一餐！
恒指再插近早前的低位，今次元兇係外圍美股期貨急插，外國傳媒解釋美股期貨下跌係中國製造業採購經理人指數(PMI)被指全面萎縮，令市場擔心中國經濟衰退。中國官方公佈製造業PMI，由7月份50，下降至8月的49.7，為2012年8月以來低位，是今年2月以來，再次跌穿50的盛衰臨界點以下，反映內地製造業增長動力不足。投資者憂慮全球衰退，歐股早段走低之餘，在港股4時收市之時，杜指期貨急跌334點，報16174點；納指期貨亦大跌103點，報4168點。
大摩唱淡踩多一腳
如果有留意，美股借內地經濟壞消息下調昨日唔係第一次。早一日《金融時報》有文章透露內地政府唔會大力買股，都曾令美股期貨勁插。之前美股收市後，喺外圍都係比較靜，呢排美股期指不時因為中國負面消息勁CHOK，可見投資情緒幾緊張。
對於美股咁反覆，陸羽仁有個解讀，喺早前美股杜指急插二千幾點之後，出現頗為強勁的反彈，一抽又抽番千幾點，根本就係大量淡倉盤平倉的技術因素造成，但美息下跌的根本因素未消，所以一輪反彈後，依家又要捱新一輪尋底，由於咁樣，無論中、美、港股都係底子差，無名腫毒稍為侵襲吓，個市就碌低。
市底已經唔好，摩根士丹利仲要再次奏起「摩笛」，在股災後率先下調恒指目標，大摩直言人民幣貶值會令企業產生匯兌虧損和增加債務壓力，若港股進入熊市，一年內有機下試18000點。
在股市亂局下，金管局發言人透露，局方按貨幣發行局機制，昨午向市場賣出62億港元，並於傍晚再注資93億港元，兩次合共向市場注入155億港元，承接等值的美元，並會繼續密切留意市場情況，維持港元穩定。金管局呢個動作反映有資金泊入香港，港元升到7.75的強方保證水平，金管局要沽港元阻止港匯升穿高位。平常咁多錢流入，對股市多少有利好作用，?家咁情況，估計資金流入係避險居多，會唔會手痕買股已經無人肯定。
雖然金管局向市場注資的消息，在港股收市前已披露，惟投資者信心差，尾市大量沽盤湧現，拖累恒指跌近500點，全日挨近低位21170點收市。恒生指數收報21185點，跌485點；國企指數收報9454點，跌287點，成交縮減至858億元。
中信舊患發作
藍籌股僅得兩隻股份錄得升幅，餘下全軍覆沒。騰訊(700) 急挫3.5%，收報127.2元，一隻就拖累恒指77點，騰訊累積升幅仍然好勁，若然要獲利沽貨仲係有大把水位。
中信股份(267) 午後沽壓增加，收挫0.78元或5%，報13.42元。佢嘅壞消息係澳洲礦業大亨兼議員帕爾默(clive Palmer)旗下Mineralogy與中信股份的訴訟有新進展，帕爾默入稟最高法院，向中信股份尋求100億澳元(相等550億港元)的特許權賠償。雙方之前為爭奪澳洲鐵礦石出口港控制權而對簿公堂，中信股份上月已獲勝訴，但Mineralogy當時已表明會提出上訴。
中信泰富喺金融海嘯前收購澳洲鐵礦搞到焦頭爛額，母公司注入資產變身中信股份，有拯救補鑊的味道，但買礦呢個負面因素喺商品價格滑落下不斷惡化，加上現時不少優質資產都跌價，股民都唔好咁衝動撈底。
陸羽仁
金融High Tea 舊文
