中環在線：羅守輝1.5億買埋隔籬屋
住董建華樓上 呎價淡市創新高
■羅守輝現持有嘉慧園頂層兩單位，隨時可以打通變巨宅。 資料圖片
■羅守輝父親羅肇唐 都說香港地有好多超級低調富豪，裕泰興創辦人「九叔」羅肇唐嘅二子羅守輝肯定係其中之一
。羅守輝係尖東廣場與北角新光戲院嘅業主，佢仲住喺前特首董建華樓上，喺老牌半山豪宅嘉慧園有個頂層單位，新近佢太太以1.48億元買埋隔籬個單位，創屋苑呎價新高。
03年買新光戲院
裕泰興生意遍及地產、按押與財務，由羅肇唐喺六十年代創立，因為羅肇唐在家中排行第九，所以被稱為「九叔」。
羅肇唐三位公子：長子羅守弘係建築師，二子羅守輝修讀工商管理，細仔羅守耀修讀電影，曾監製電影《黑社會》，又負責為裕泰興見傳媒，較為市場認識。羅守弘與羅守輝則極之低調，特別係羅守輝，傳媒好難見到佢一面。
羅守輝最為人認識，係佢喺2003年買入新光戲院，呢個消息震撼粵劇界，業界關心羅守輝會否保留新光戲院。據講，羅守輝有廿年地產投資嘅經驗，偏愛長線投資，但係外間對佢嘅投資組合所知有限。
住宅方面，羅守輝喺2005年以3,500萬元買入嘉慧園G座頂層單位自住。隔籬H室，最近就以1.48億元賣出，呎價4.44萬元，創整幢豪宅呎價新高。
按田土廳資料，買家正是羅守輝太太梁婉玲（Leung,Yuen Ling Elina），兩個單位實呎分別係3,349方呎，隨時可以打通成6,700呎巨宅！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
