魚樂無窮：平靚正基金愛股
■東瀛遊中期盈利大升1.6倍，更宣佈首度派息5仙。 資料圖片
港股雖未能企穩23000大關，但回吐兩日又似跌唔落，於10日線水平反覆，下周內地召開五中全會以及儲局舉行議息會議，加上中資股季績進入高峯，後市料暫難有驚喜。
恒指10月以來累升2,000點，究竟
係邊個買上嚟？還記得蘋果散戶指數9月時出現零入市意慾，股民悲觀至極點，由此推斷，今浪攻勢應由基金策動。事實上，雖然第二季經歷大時代，但其後中港股災頻頻，今年要搵食絕對唔易。由於要向客戶交代，基金今季必定發力起勢追，買入低殘基金股等粉飾櫥窗，隨時有意想不到效果，今日推介嘅東瀛遊（6882），正正有呢個憧憬。
戰友不善忘的話，都知道東瀛遊乃唐牛第三季心水推介，可惜生不逢時，撞正暴力救市，結果一瀉如注，一度較推介價低逾三成。不過，東瀛遊質地實在不差︰中期盈利大升1.6倍，毛利率增加6.5個百分點至26%，更宣佈首度派息5仙。正因如此，金手指惠理對其不離不棄，上市後一直增持，最新持股量超過6%，最後一次增持價2.43元，較現價還要高。聖誕節乃旅遊旺季，加上日圓持續低迷，東瀛遊生意肯定大旺，今季多一個炒作理由，近期股價呈靚圓底，收集手影明顯，下一站睇2.7元，屆時年度化市盈率僅8倍！
唐牛
https://www.facebook.com/tongcow88
唐牛
魚樂無窮 - 唐牛 舊文
