異動空間：第四季反攻關鍵
寫咗兩篇回顧，10月頭都係寫番篇第四季前瞻。不少散戶以為股評人手握水晶球，能知三日事，富貴千萬年，真係睇到，早就上岸嘆世界了。炒股除了是金錢遊戲，也是經驗的比拼，炒股高手通常都唔鍾意吹水預測，但應變能力卻是超高，因腦袋早已想好幾個方案，個市點行就按預設的方案
接招，事後再檢討累積經驗，業餘與專業炒家的分別，相信就在於此。
港股連跌五個月，十年未見過，10月會否再跌？不如換個角度分析：有何因素可令個市大反彈？現階段睇，挾淡倉升兩日不難，但要引到錢前仆後繼再入市，需要一個新投資主題，信服到令重傷的基金大戶都覺得，博呢個主題有機會翻身先得，但暫時天馬行空都諗唔到。
多年QE證明最多谷起股市，經濟仍是半死不活，美元未加息、中國經濟減速，商品市場已崩潰，新興貨幣大幅貶值，全球似通縮多於通脹，賤物鬥窮人時代或許不遠。通縮揸現金是常識，乜都越來越平，望嚇金沙（1928）等一眾濠賭股，近月才開始爭相劈房價搶客，顯然未到最壞情況，股價邊有得估底？今季繼續少做少錯，有反彈打兩鋪遊擊就算了。
魏力
http://www.facebook.com/2012jason
魏力
異動空間 - 魏力 舊文
