十月趕救市
2015年10月02日
十．一假期前，港股在期指結算後反彈二百幾點，有多少搶喺美股之前偷升的味道，前晚美股高收二百幾點，第三季埋單，美股回調不足一成，已經係全球最強的主要股市。
長假後料陸續出招
內地雖然放長假，但官員無俾悠閒氣氛感染，假前中央公佈多項措施提振消費
，頗有在十月前趕推救市措施的味道。阿爺咁急出招，除咗話十月係傳統股災月，加上最新經濟數據唔靚仔，都令中央唔敢掉以輕心。
據財新中國九月通用服務業經營活動指數跌至50.5，低過八月的51.5，創14個月新低，數據顯示服務業活動擴張速度減慢；中國9月官方製造業採購經理指數(PMI)表現就好少少，上升至49.8，較8月微增0.1，是近4個月來首次回升，反映製造業活動收縮速度減慢。調查顯示，抗戰勝利70周年閱兵活動，某程度影響客戶數量及新定單表現。
由於內地數據仲係疲弱，中央喺黃金周長假前已有動作，包括事隔六年再谷車市。國務院日前宣佈，由當日起至明年底，購買汽缸容量低於1.6公升的小型汽車，購置稅將減半，即由10%減至5%。同一時間，人行、銀監會昨日宣佈，在不實施限購措施的城市，購買首套房最低首期比例，由之前的30%降低至25%，實行樓市車市雙線催谷。
中央大力救經濟，淨係呢兩招相信唔夠，估計放完長假後，仲會有招數陸續出台。內地賣樓有金九銀十的傳統，九月係賣樓最重要的時間，跟住十月仍然係高峰期，銀監喺十月前容許放水入樓市，好明顯係想趁賣樓旺季未完，推動樓市氣氛。我估計阿爺係睇到公佈出來的數據唔靚仔，於是同一時間放番啲措施出來，沖淡不利氣氛，依家市底偏弱，預防點都好過治療，喺個市未俾壞消息打散前就出手，總好過等個市插完去救喇。
喺中央出招下，假前恒生指數收造20846點，升289點；國企指數收報9405點，成交852億元。內地勁劈小排量乘用車稅率，瑞信隨即調高汽車業評級至「增持」，一眾汽車股炒升。除淨的長城汽車(2333) ，股價大升21%，報8.56元，是升幅最大的國企指數成份股；吉利(175) 急揚16.4%，報3.69元，東風(489) 炒高15.16%，報9.65元；比亞迪(1211) 也升6.8%，報40.85元。早排車股受德國大眾汽車出術消息打擊跌到一仆一碌，國際間擔心事件引起連鎖效應，阿爺救車市間接都有頂住車廠的味道，呢次股價彈得急，都因為先前股價跌得太殘所致。
同人唔同命，濠賭股黃金周就無好消息，仲要受收緊銀聯卡境外提款執多劑。龍頭金沙(1928) 挫4%，報23.3元，銀娛(027) 降0.81%，報19.7元，金沙與銀娛是為表現最差藍籌股。澳門賭收持續下滑，近月跌穿兩百億元警戒線，但暫時仲見唔到中央有心軟跡象，先前好多消息話點樣打救澳門博彩旅遊業，事後證明吹水居多。濠賭股呢一年半成為股民的死亡陷阱，基本上買咗無走都要輸錢，可見阿爺收緊政策的殺傷力幾厲害。
新一季賣地奇少
放假前發展局宣佈新一季賣地計劃，推出單位只有四千幾個，拍賣官地全部都喺新界，一幅市區地都無之餘，仲有三幅地有官司纏身，初步估計官地總值都係百零億元，隨時一個發展商都可以買起晒。新一季大賣未淨身官地，解釋咗點解之前當局要有司法覆核都夾粗賣九龍大窩坪延坪道地王，搞到收少咗幾十億地價。有發展商私底下質疑，政府狂賣一輪地皮後，仲有幾多地皮可以推出。如果推地接唔到上來，之前猛賣地皮就變咗前功盡廢，所以依家最想加息的，可能就係特區政府。
今個星期二，特首喺開行政會議前見記者，明確提到話唔會減辣，睇完推地數字，就知當局根本無減辣條件。有人話特首可能同阿爺一樣，係玩期望控制，明知推地數字出來有啲爆鑊，除咗揀喺放假前公佈計劃，仲預先砌定樓市，做定期望控制先。
陸羽仁
金融High Tea 舊文
