放水益到內銀
2015年10月14日
內地出重招救市，但因為之前全球股市都已經反彈咗一段，所以有好消息都要唞唞。今次內地推出疑似七萬億元的中國版QE，可見內地都覺得形勢不容有失，要大力放水浮番起經濟。但阿爺沒有唱得太行，正面效應又唔至於噴發而出。
中國成為全球第三大經濟體，佢嘅表現影響全世界，並
且同美歐形成互動，中國係第三季下行情況，已經令外資大為緊張。最近美資高盛就由知名分析員Peter Oppenheimer的團隊，就以「歡迎金融危機第三波」為題，分析由美國抽緊銀根導致商品熊市同中國現時面對的危機。
阿爺放水力拒第三波
由於美國以量化寬鬆應對2009年的金融海嘯，造成大量資金湧入中國。高盛認為，這些資金大舉投資，但效率非常不足，結果形成大量呆置資產同負債，令到融資出現困難。本來，當美國情況開始穩定，新興市場撤資會紓緩，但跟住到歐洲債務危機好轉，美國央行唔再加印銀紙放水，令新興市場繼續面對壓力。
Peter Oppenheimer解釋咗點解包括中國在內的新興市場，呢幾年點解環境咁差，同埋商品價格為何跌完又跌。按照高盛講法，過去八年美國、歐洲先後大舉放水，造成資金巨浪湧向金磚四角等新興市場，跟住過去幾年美國開始扭番實水喉，中國喺資金退潮下出現放緩，形成經濟危機。照咁講，呢一次拋出中國版QE，就係要頂住西方央行閂水喉，有點救災的味道。
有人會話，美、歐放水令資金氾濫，觸發內地過熱，重複投資同效率不足等問題，依家中央再放水，豈不是令問題持續落去。咁講聽落無錯，但從執政者角度，經濟滑坡滋生民怨，等同係政治自殺，為救命仲點理得咁多，正如金融海嘯爆發，美國有理無理用直升機灑銀紙救市，仲講乜嘢道德風險同金融紀律？
所以，依家睇阿爺放水，唔係道德上啱唔啱，或者長遠經濟有無效率，而係佢會唔會一救到底，同埋有無力繼續落去。最樂觀估計，係內地不斷放水，撐住咗新興市場增長，最後保住全球穩定，否則馬上就係另一輪衰退嘅開始。
由於阿爺放水力抗第三波，勝負無咁快會知，喺放水過程初期，救市刺激會比較明顯，投資者有機會可以順勢而炒返一轉。至於長線的泡沫經濟病，就同美國、歐洲、日本齊齊受。
有利改善貸款質素
宏觀分析完一輪，最緊要係操作層面有乜要做。喺放水措施公佈後，中港兩市繼續消化打底，上證指數全日收報3293點，升咗5點；深成指數報11042點，升80點。港股一度挫逾兩百點，但尾市跌幅削半，恒生指數收報22600點，跌130點；國企指數收報10437點，跌0.95點，成交金額799億元。國企股表現相對穩陣。收市後，由於港匯再觸及7.75強方兌換保證，金管局承接美元沽盤，向銀行體系注入69.75億港元，顯示資金可能再泊來香港。
如果按阿爺今次放七萬億QE呢個說法有一半堅，資金都會透過質押流入銀行體系，除咗話依家水緊嘅內房商受惠，同樣得益嘅應該係內銀。
由於睇到經濟下滑，中國大型銀行過去一段時間已經唔敢放水畀中小企同民企，主要借錢畀國企。理論上國企唔會執笠，貸款唔會有壞帳，實質上經濟轉呆，好多國企都企咗係度，借畀佢哋嘅錢都係郁唔到，有點酸酸哋。若然阿爺玩量寬有大水流番去個市，點都對資產價格同企業有好處，內銀的壞帳唔會急升，所以見到內銀股如果回返，不妨分段低吸。
陸羽仁
金融High Tea 舊文
