中環在線：馬雲發起光棍節第7年
商家搶推優惠 抽「雙11」水
■馬雲7年前發起嘅「雙11」網上購物日，已變成年度盛事。 資料圖片 有時不得不佩服阿里巴巴創辦人馬雲，佢發起嘅「雙11」（又名光棍節)網上購物日，今年去到第7屆，已變成年
度盛事。今日雙11，有人估一日商品交易量可以突破千億，仲多過港股成交額！今年唔少商家都抽雙11水，趁機推出優惠，就連蘋果都喺今日推新機，似係趁墟。
有份於雙11推優惠嘅電訊商相當進取，例如3香港與中國移動香港都推出月費減免，最多可以免交月費3個月，吸引客戶透過網站上台；而中移動香港更喺網上將iPhone6s減價200元，唔知搶到玫瑰金嘅iPhone6s買家，去番先達放機仲有冇得賺呢？出名產品較平嘅小米，除推出1元鬥快網上搶購手機同小米手環等配件外，更將小米Note減價500元至2,499元。
759阿信屋亦加入戰團，但要客戶由網上購物，走番去舖頭濕平，推出「689折扣優惠」。
蘋果推加大碼iPad
最抽水可能係樂視，佢話今日推出5項優惠，較特別係首111名買到樂視盒子嘅用戶，可再免費收看一年影片劇集，但其餘優惠同之前公佈過嘅好似差唔多喎。
今年雙11購物日影響之大，就連熱愛中國嘅蘋果行政總裁庫克都好似想趁墟，有「加大碼iPad」之稱嘅新產品蘋果iPad Pro，咁啱都喺今日開始接受預訂，令到呢日更加熱鬧。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
