中環在線：峻巒被指位置偏遠
新地張太反擊老趙
新地（016）與長實地產（1113）兩大龍頭發展商，事隔十幾年再次正面對撼，兩個元朗同區新盤峻巒同世宙互相搶客，暫時未知邊個好賣，但一場口水戰已經爆發。
長實執董趙國雄（老趙）一向寸嘴，踩對方樓盤唔出奇，奇就奇在，今次佢可以辣㷫平時只
會照稿讀嘅新地代理業務部總經理張卓秀敏（張太），惹來對方噚日爆肚反擊！
「人人搭車嚟 邊有人行路」
老趙呢排不時都話新地嘅峻巒位置偏遠，日前又講，話兩個新盤其實唔算同區，「由嗰度（峻巒）行路去世宙，可能要兩個鐘」，意指長實個盤喺市中心，對手就喺山旯旮（世宙近西鐵朗屏站，峻巒近沙埔）。
張太噚日現身推盤時，初時都係照稿讀就算，點知一提到被人話位置偏遠，佢內心團火就爆嘞。
張太話「人人入嚟元朗都係搭車，邊有人會行，但係入到嚟峻巒就應該要行，因為周邊環境太靚，要慢慢欣賞」。
佢續指，元朗嘅市中心喺YOHO（當然係新地㗎喇），揚言「邊度有最靚嘅商場（意指YOHO Mall）就係市中心」！
其實成件事令大家覺得有趣，係因為張太一向畀人印象比較平實，平時對住傳媒講嘢，都係點到即止，多數只係跟稿讀。
每逢有記者問佢其他問題，佢都會答「遲啲話你知」、「唔講得」同「部署中」三句口頭蟬。今次張太突然爆肚大反擊，兩盤大戰火藥味真係濃。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
