中環在線：
歡喜冤家互射12碼
小加兩擋張華峰
■張華峰射三球，有兩球被李小加救出。
深港通今年開通無望，港交所（388）行政總裁李小加成日話中港兩地溝通良好，講多無謂，用行動證明最實際。港交所噚日果然約埋深交所代表，一齊喺銅鑼灣南華體育會踢友誼波，李小加仲同歡喜冤家立法會議員（
金融服務界）張華峰有場單對單比賽㖭呀。
李小加之前因為一啲證券界關注嘅問題，當面跟張華峰頂撞咗幾句，雖然兩位事後好快拍膊頭扮冇嘢，但有時又會暗寸對方，於是成為一對歡喜冤家。噚日有呢場李小加與張華峰互射12碼嘅比賽，認真過癮。
深交所K.O.港交所
聽聞呢場比賽係臨時加插，由李小加與張華峰各踢3球，先由張華峰表演。張華峰平日摸住大肚腩當然cute喇，踢波走位始終唔夠靈活，不過佢都入到一球。踢開波嘅李小加就3球入曬，張華峰嘅龐大身軀係擋唔到波㗎。
講番港交所與深交所嘅比賽，深交所一行30幾人，包括中小板、IT等部門，落場唔夠2分鐘就射入一球，下半場，李小加忍唔住落場代表港交所踢埋一份，做前鋒，但冇進賬，最後零比一，輸咗畀深交所。證券學會會長李細燕噚日有份做啦啦隊，大讚深交所代表好腳法。
踢完波，佢哋就一齊喺南華會飲茶聯誼，交流球技。其實踢波都係其次，深交所今次來港，主要係跟港交所與本港證券業界進行業務交流，討論點樣加強兩地金融合作，深交所下晝就拉大隊，去港交所位於將軍澳嘅數據中心參觀，唔知有冇討論到深港通幾時開通呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
