魚樂無窮：逆市企硬績優股
■奧普中期盈利按升37%；圖為集團主席方傑。 資料圖片
股票投資各師各法，有人愛速戰速決，大注炒細價股，博賺一兩格，贏輸都走，絕不過夜；有人愛穩穩陣陣，月供藍籌股，拉勻成本，細水長流，博財息兼收。究竟邊個方法先係王道？其實好視乎個人性格、承受風險能力，你叫冒
險家月供滙控（005），只怕會被回敬粗口，同樣地，退休人士只求安享晚年，亦唔夠心血炒仙股。
唐牛就愛雙龍出海，既短炒細價股，又長揸績優股，無他，市況主宰一切。市旺時，甚麼仙股妖股炒到啪啪聲，只要順勢而行，贏錢易過食生菜；相反，市弱時寸草不生，資金必向績優股埋手，自動波炒上，同樣感覺良好。
港股連跌六個交易日，能夠逆市企穩嘅，絕非池中物，今日推介嘅奧普（477），仲要突破橫行區，積分雙倍累積。戰友不善忘的話，應該記得奧普乃唐牛今年第二季推介，簡單再介紹一下。
公司主要喺內地設計及產銷集取暖、照明及通風於一身嘅浴霸、1+N浴頂等，銷售網點近6,000家。中期盈利按升37%，毛利率擴闊1個百分點至47.7%，各城市溢利更全線上升，現價市盈率12倍，股息率近8厘，股價企硬理據十分足夠。大股東方勝康月初身體力行增持，似乎已預示佳績可保持，噚日大成交破位，正大步向新高2.62元出發！
唐牛
https://www.facebook.com/tongcow88
唐牛
魚樂無窮 - 唐牛 舊文
