智取大市：
點解人仔納SDR冇料到
■短期而言，人民幣納入SDR會係中性偏負面嘅消息。 資料圖片
人民幣納入SDR，講到好似好重要咁，話係人民幣國際化邁向嘅一大步，咁點解港股嘅反應又如此冷淡呢？
簡單啲講，人民幣作為一種貨幣，個人、機構可以用佢嚟交易以及投資，政府仲可以用佢嚟做儲備，
以平衡國家財政嘅風險。
今次人民幣納入SDR，在於外國政府立場，持有多啲人民幣，其實冇壞嘅，因為人民幣好多時候係唔點升又唔點跌，始終相對歐元同新興市場貨幣長期強勢，如果只係喺儲備之中有限度咁持有人民幣，冇乜風險，同時能夠畀個面中國，有利外交，何樂而不為呢？
大媽留內地 寧無王管
之不過，如果私人、企業冇興趣加大應用人民幣從而令人民幣喺國際上嘅流轉速度加快，事實上政府儲備增持人民幣都冇乜太大意思，充其量令人民銀行多咗外滙儲備。
論個人及機構對於人仔需求，兩個字：疲弱。今年發生嘅一連串事情，就可以畀大家睇到，內地同埋海外私人資本根本冇乜興趣進入對方嘅陣地；滬港通反應表現冷淡、外資外流，就可以睇得出外資無意加大內地資本市場注碼；至於大陸資金，喺A股年中股災之後，甚至有大媽將大陸債市當股市一樣亂咁炒，由此可見，唔少內地投資者寧願留喺無王管、只得官話事嘅內地資本市場，死都唔出去有秩序嘅海外市場。篇幅有限，呢方面恕不詳述。
不跟規矩 外資唔buy
點解海外投資者對於投資人民幣資產咁冇興趣呢？其實好簡單啫，咁多年以嚟，內地究竟拎咗啲乜嘢畀外國人投資先，係高負債國企？假數民企？定係隱藏資產極多嘅內銀？上市企業當中，一係買到驚，一係就唔想買。
雖然中國唔係冇好嘅項目，不過一係賣天價，一係就冇上市，外資呢一刻要搵有潛力嘅企業，就要學誠哥嘅維港咁，投資內地高科技中小企吧，不過連誠哥都俾人紅牌趕咗出場，內地潛規則想點寫就點寫，外資又點會有意欲發掘好嘅內地投資呢？
外資唔buy中國，內地投資者又唔buy外國，係內地長期唔跟國際遊戲規則行事嘅惡果，今年A股亂咁救市，更加係行倒車。
今次人民幣納入SDR，以至人民幣走出去，相信喺未來兩年只會流於各國政府外交畀面派對，所謂人民幣國際化、市場化，根本唔係內地單方面可以決定，而係由市場、國際去決定，家陣市場就係唔buy人民幣，你做幾多都係冇用。內地想力sell人民幣換外滙救國？如意算盤肯定打唔響。
短期而言，人民幣納入SDR會係中性偏負面嘅消息，因為大家慢慢發現呢個消息對股市冇幫助，變為失望，梗係先沽為敬。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
