挖肉補瘡益港鐵股東
2015年12月01日
港股今個星期開市氣氛審慎，主要係跟從內地市況波動。由於內地股市下午反彈，港股形勢稍定，但收市都要跌幾十點，出現六連跌。市場焦點係國際貨幣基金會傾人民幣入籃結果係點。
之前一直擔心內地股市會在入籃時出現好消息出貨的現象，不過內地股市上周五
已插5.5%，昨日上證綜指最低時再跌3.2%，加埋有近9%的調整，未到人仔入籃，股市回吐深度已夠，所以昨日下午1點多就見咗個底，之後炒番上，上證收市仲變成微升0.3%，單日轉向從低位反彈3.5%。
港鐵派息 小股東拍手
坊間有個憂慮，係人仔入籃後阿爺是否不會再托匯價，或者外資會唔會借機會狙擊，推低人仔匯價。人仔入籃理論上會增加外國央行持有的誘因，點解會變成擔心狙擊呢？陸羽仁同一位威猛銀行家傾，佢解釋人仔入籃理論上係長遠政策，照計即時唔會有好大需求買人仔，但同時亦唔應該多了機會被人狙擊。坊間擔心貶值，只係因為入籃條件係要求中國跟從市場辦事，由於外資多睇淡人仔匯價，若然增加市場機制，人仔貶值機會就大過升值。
內地經濟差，外資認為人仔有貶值需要，但阿爺考慮人仔匯價唔會咁簡單，因為人仔大幅貶值，對左鄰右里有好大影響，特別中國搞緊「一帶一路」計劃，要亞洲國家支持，若然人仔大跌，搞到鄰居雞毛鴨血，都無人想跟中國玩，所以中國主觀上不想貶。不過，從入籃會引發貶值呢個邏輯，可以見到市場氣氛偏向審慎，外資會將人仔貶值當作一個風險因素。到入籃好消息證實後，要睇住佢開大開細，好彩係個市跌了咁多日，沽壓已經減輕唔少。
11月份港股弱弱哋，昨日到月尾恒生指數連跌六日，收報21996點，跌71點；國企指數收報9790點，跌65點，成交增至1007億元，同一時間沽空金額115.7億元，沽空比率11.5%。
收市後，港鐵(066) 公佈高鐵造價增加194.2億元，同時公司將合共派每股4.4元特別股息，涉及金額合共257.6億元，當中持有港鐵75.7%股權的政府將會獲派195.1億元特別股息。政府收到息後唔攞走，再注資入港鐵，補番起高鐵條數，由於唔使庫房直接出錢，希望去到立法會財委會時容易啲通過。
港鐵同政府呢招「挖肉補瘡」，益埋小股東，每股收4.4元特別息，以上日收市價36元計，等如收了12.2%息，大派高息，相信投資者會舉腳贊成，佢哋會話呢啲好事不妨多為。
近日有好多間公司停牌，其中一隻係太平洋恩利(1174) ，公司透露屬下在新加坡上市的子公司被銀行商討清盤。太平洋恩利過往不斷擴張。為了支持發展，公司透過分拆同供股多次抽水，資料顯示佢喺2007、2009、2012、2014年都試過供股。今次屬下公司被銀行追數，相信小股東都無運行。
准啤殼唔准賣殼？
做生意有賺有蝕，太平洋恩利押錯注漁業，小股東上了車都好無奈。係正常情況，小股東唯有望公司賣殼，家一個殼都話值五、六億元，賣股成功小股東可以收番一筆，又或者博新股東有搞作。
不過，家市場不斷傳緊當局要收緊賣殼，以防好多公司借上市「啤殼」。對於呢個新政方向，市場其實都幾有意見。有中環茶友形容，咁樣係只許州官放火，不許百姓點燈。家新公司上市無日無之，好多一上就潛水，過幾個月宣佈業績走晒樣，當局話呢類公司「啤殼」，要限制賣殼注資。有人就問，要打擊啤殼，乜唔係應該收緊上市門檻咩？公司上完市，小股東上了車，公司生意失敗，小股東連賣殼執番少少都唔得，咁實在太過絕情喎！
批評者話，港交所(388) 任人「啤殼」自己執上市費，跟住又唔俾賣殼，咁小股民買了潛水股，咁咪無得翻身，做法真係值得商榷。如果要禁止賣殼，首先要提高番新股水準，唔好畀咁多公司上市先至啱囉。
陸羽仁
金融High Tea 舊文
