削肉孝行值得學習
2015年12月02日
人民幣成功宣佈入籃，港股應聲高開，而且愈升愈有，收報升384點，算做有咗交代。
人仔成功入籃，在SDR籃子的比重將為10.92%，呢個權重比IMF特別提款權部主管Warren Coats所預計的13.8%為低。入籃好消息證實，香港大市初期
反應利好，但跟住係點仲要睇多兩日。中環茶友話其中兩點要留意，一樣係入籃後人仔匯價會點走；二係內地企業會唔會加快用人仔走出去投資外地。
阿爺發功 內房爆上
人仔在入籃前後匯價偏軟，昨日再稍為回軟，但幅度溫和。中國外匯交易中心數據顯示，美元兌人民幣收報6.3987，較上日升了6點子。若然人仔腳軟，對港股不利。同一時間，人仔因為入籃認受性加強，走出去速度加快，香港就有可能得益，所以入籃係兩刃劍，有辣有唔辣。喺咁情況下，投資揀股好重要。
昨日港股終止六連跌。恒生指數收造22381點，升384點；國企指數收9947點，升157點，但成交僅805億元，暫時睇入市資金唔係咁夠氣勢，只係跌得多買番啲嘢。中行(3988) 兩母子做較多國際業務，受惠於人仔入籃，升得較好，中國銀行升1.7%，中銀香港(2388) 升2%，升得比工行(1398) 多。
藍籌股中，內房股升得唔錯。內地有報道指出，中央計劃出招撐樓市，增加住房按揭貸款利息支出等專項扣除項目。受消息沖喜，內地多隻房地/股份升停板，本港上市的內房股亦急升。萬科(2202) 爆升7%，報20.7元，升幅是國企指數最勁；華潤置地(1109) 彈升7.7%，報22.45元，跑贏一眾藍籌股，另外恒大(3333) 升3.1%收6.3元。
政府和港鐵(066) 為咗替高鐵項目補鑊，毅然叫港鐵削肉還母，宣佈派發4.4元特別股息，港府收195.1億元去填高鐵超支條數，小股東則收到62.5億元，消息公佈後港鐵反應唔大，收報36.65元，升0.65元，升幅1.8%，只是跟大市升幅，追唔上派特別息數目(即係12%)，呢個反應相信多少係因為議員炮轟話港鐵玩財技，又有評論話搵港鐵找數，影響咗判斷。
高鐵超支係港鐵前景一個大炸彈，呢次港鐵用派258億元豪拆炸彈，從小股東角度有兩個好處。第一係有現錢收，今次港鐵派200幾億元股息，呢啲本來就係公司錢，派番出街，大小股東一齊收，小股東「現兜兜」落袋，點解唔爽？而大股東收到的錢反而要去填超支的數，唔係叫港鐵去填，即係超支由庫房俾唔係由港鐵股東賠，話「港鐵找數」其實係捉錯用神。第二係減少不明朗，拖住條高鐵超支數唔知邊個找，對港鐵不利，雖然港鐵小股東接受方案，要承擔高鐵封頂價，有多要港鐵填，但按港鐵主席錢果豐講，隨着工程不斷推進，「個水晶球愈來愈透明」，風險已經大減。
派錢縮折讓何樂不為
嚴格講，港鐵市值龐大，派200幾億對佢股價唔會有根本刺激。港鐵收入?家有不少來自地產，未來股價係睇樓市表現多過派高息影響。不過，由於分兩年有4.4元特別息支撐，除淨前後相信佢股價會好過其他地產股。
講開又講，港鐵呢次削肉還母，其實好值得其他地產股大股東學習。呢排派高息的公司唔少，好似華置(127) 賣產就派過幾次，另外安全倉(237) 賣產，大家又博佢分錢。本港地產股絕大部份都身家重秤，尤其過去幾年出現樓價猛升、股價唔升的現象，變成股價相對資產值折讓不斷擴大。如果公司有銀、大股東持股比例高，派發特別息出來畀大、小股東，減低折讓，股價隨時仲好過以前，計落身家仲多咗，好過公司有錢得個睇字，這些利己利人招數，管理層真係應該要多做多諗呀！
陸羽仁
金融High Tea 舊文
